យោងតាមការផ្សាយរបស់សារព័ត៌មានបរទេស បានបង្ហាញថាអណ្ដាតប្រៀបដូចជា “បង្អួច” ឆ្លុះបញ្ចាំងពីសុខភាពខាងក្នុងរាងកាយ។ ជាធម្មតា អណ្ដាតដែលមានសុខភាពល្អត្រូវមាន ពណ៌ផ្កាឈូកស្រាល និងមានសំណើម។ ប្រសិនបើអណ្ដាតប្រែជា ស្លេក វាអាចជាសញ្ញានៃកង្វះឈាម ឬសម្រាកមិនគ្រប់គ្រាន់ ប៉ុន្តែបើ ក្រហមភ្លឺ ខុសធម្មតា វាអាចបញ្ជាក់ពីការរលាក ឬការឆ្លងមេរោគក្នុងខ្លួន។ ចំណែកឯអណ្ដាតដែលមាន ស្រទាប់សក្រាស់ ឬពណ៌លឿងត្នោត អាចបណ្ដាលមកពីការឆ្លងមេរោគផ្សិត បញ្ហារំលាយអាហារ ឬការជក់បារីច្រើនពេក។
ក្រៅពីពណ៌ រូបរាងអណ្ដាតក៏សំខាន់ដែរ៖ ស្នាមធ្មេញនៅគែមអណ្ដាត អាចបង្ហាញពីភាពតានតឹង ឬការដក់ជាតិទឹកក្នុងខ្លួន ខណៈ អណ្ដាតប្រេះ ឬរលោងពេក អាចជាសញ្ញានៃកង្វះវីតាមីន។ អ្វីដែលអ្នកត្រូវប្រុងប្រយ័ត្នបំផុតនោះគឺ ប្រសិនបើមាន ដំបៅ ឬដុំពក ដែលមិនជាសះស្បើយលើសពី ២ សប្តាហ៍ ឬមានអាការៈ ហើមអណ្ដាតខ្លាំងរហូតដល់ពិបាកដកដង្ហើម អ្នកត្រូវតែប្រញាប់ទៅជួបគ្រូពេទ្យជាបន្ទាន់ ព្រោះវាអាចជាសញ្ញាព្រមាននៃជំងឺធ្ងន់ធ្ងរ៕