យោងតាមការស្រាវជ្រាវនិងការផ្សាយរបស់សារព័ត៌មានបរទេស បានបង្ហាញថា ការជ្រើសរើសរបស់ប្រើប្រាស់ដែលមានតម្លៃថោកខុសធម្មតា អាចនាំមកនូវគ្រោះថ្នាក់ដែលនឹកស្មានមិនដល់មកក្នុងផ្ទះរបស់អ្នក។
អ្នកជំនាញបានដាស់តឿនឱ្យប្រុងប្រយ័ត្នបំផុតចំពោះពែងក្រដាសស្រោបពណ៌មាស ដែលអាចរលាយជាតិលោហៈធ្ងន់ដូចជាអាលុយមីញ៉ូម និងទង់ដែងចូលក្នុងភេសជ្ជៈក្ដៅៗ។ ស្រដៀងគ្នានេះដែរ ស្បែកជើងជ័រ PVC ថោកៗតែងមានផ្ទុកសារធាតុគីមីដែលប៉ះពាល់ដល់អ័រម៉ូន ជាពិសេសចំពោះកុមារតូចៗ ដែលផ្ទុយពីជ័រប្រភេទ EVA ដែលមានសុវត្ថិភាពជាង។
ចំពោះសម្ភារផ្ទះបាយ ចានសេរ៉ាមិចគុណភាពទាបដែលប្រើផ្លាស្ទិចប្រភេទ Urea-formaldehyde អាចបញ្ចេញសារធាតុ Formaldehyde បង្កមហារីកនៅពេលប៉ះកម្ដៅ ខណៈដែលឆ្នាំងដែកកែច្នៃថោកៗដែលផលិតពីដែកអេតចាយ ឬធុងគីមីចាស់ៗ អាចបន្សល់ជាតិពុលក្នុងអាហារដែលអ្នកញ៉ាំរាល់ថ្ងៃ។
ចំណុចចុងក្រោយដែលគួរប្រុងប្រយ័ត្ន គឺកែវទឹកពណ៌ឆើតឆាយដែលប្រើថ្នាំជ្រលក់ជាតិសំណ។ ដើម្បីសុវត្ថិភាពគ្រួសារ អ្នកគួរជ្រើសរើសកែវប្រភេទ Borosilicate ដែលធន់នឹងកម្ដៅ និងចានដែលមានលំនាំនៅក្រោមស្រទាប់រលោងដើម្បីជៀសវាងការប៉ះពាល់ផ្ទាល់ជាមួយជាតិគីមី។
ការចំណាយបន្ថែមបន្តិចបន្តួចដើម្បីគុណភាព គឺជាការវិនិយោគដ៏ល្អបំផុតសម្រាប់សុខភាពយូរអង្វែង៕