សុខភាព៖ យោងតាមគេហទំព័រ WebMD តម្រងនោមមានតួនាទីយ៉ាងសំខាន់ក្នុងការចម្រោះជាតិពុលចេញពីរាងកាយ ប៉ុន្តែរបបអាហារពេលព្រឹកដែលមិនត្រឹមត្រូវអាចធ្វើឱ្យសរីរាង្គនេះចុះខ្សោយយ៉ាងឆាប់រហ័ស។
អាហារដែលគួរចៀសវាងបំផុតគឺ អាហារកែច្នៃស្រាប់ៗ និងសាច់ក្រក ព្រោះវាសម្បូរទៅដោយជាតិអំបិល (សូដ្យូម) និងផូស្វ័រខ្ពស់ ដែលបង្ខំឱ្យតម្រងនោមធ្វើការធ្ងន់ និងបង្កឱ្យឡើងសម្ពាធឈាម។ ទន្ទឹមនឹងនេះ ធញ្ញជាតិ ឬនំប៉័ងដែលមានជាតិផ្អែមខ្លាំង ក៏ជាមេខ្លោងបង្កឱ្យមានបញ្ហាស៊ាំអាំងស៊ុយលីន និងលើសជាតិស្ករ ដែលជាមូលហេតុចម្បងនៃជំងឺតម្រងនោមរ៉ាំរ៉ៃ។
ក្រៅពីអាហាររឹង ទឹកផ្លែឈើដប ក៏ជាជម្រើសមិនល្អសម្រាប់សុខភាពតម្រងនោមដែរ ដោយសារវាខ្វះជាតិសរសៃ និងសម្បូរទៅដោយស្ករកែច្នៃច្រើនលើសលប់។ ការផ្លាស់ប្តូរមកទទួលទានអាហារស្រស់ៗ មិនប្រៃពេក និងមិនផ្អែមពេក គឺជាវិធីសាស្ត្រដ៏ល្អបំផុតដើម្បីការពារតម្រងនោមរបស់អ្នកឱ្យនៅមានសុខភាពល្អ និងដំណើរការបានល្អប្រសើរយូរអង្វែង៕