យោងការផ្សាយរបស់សារព័ត៌មានបរទេស ការញ៉ាំក្រូចឆ្មារជារៀងរាល់ថ្ងៃ មិនត្រឹមតែផ្ដល់រសជាតិស្រស់ស្រាយប៉ុណ្ណោះទេ ប៉ុន្តែវាផ្ដល់អត្ថប្រយោជន៍ដ៏អស្ចារ្យដល់សរីរាង្គខាងក្នុង។ ចំណុចសំខាន់បំផុតមួយគឺ ការការពារក្រួសក្នុងតម្រងនោម ព្រោះអាស៊ីតនៃក្រូចឆ្មារ ជួយបង្កើនកម្រិតស៊ីត្រាតក្នុងទឹកនោម ដែលទៅរារាំងការកកើតគ្រីស្តាល់កាល់ស្យូម ដែលជាមូលហេតុបង្កឱ្យមានក្រួសក្នុងតម្រងនោមដ៏ឈឺចាប់។
ក្រៅពីតម្រងនោម ក្រូចឆ្មារគឺជា មិត្តដ៏ល្អរបស់បេះដូង។ វីតាមីន C និងសារធាតុ Phenolic ជួយការពារកោសិកាសរសៃឈាមពីរ៉ាឌីកាល់សេរី កាត់បន្ថយសម្ពាធឈាម និងកម្រិតកូឡេស្តេរ៉ុលអាក្រក់ ដែលជួយបង្ការជំងឺក្រិនសរសៃឈាម។ លើសពីនេះ សម្រាប់អ្នកដែលចូលចិត្តញ៉ាំបន្លែ ក្រូចឆ្មារជួយ ជំរុញការស្រូបយកជាតិដែក ពីរុក្ខជាតិបានកាន់តែប្រសើរ ការពារអ្នកពីជំងឺស្លេកស្លាំង និងធ្វើឱ្យរាងកាយមានកម្លាំងមាំមួន។
អាថ៌កំបាំងដែលមនុស្សភាគច្រើនមិនដឹង គឺស្ថិតនៅលើ សំបកក្រូចឆ្មារ។ សំបករបស់វាសម្បូរទៅដោយសារធាតុប្រឆាំងអុកស៊ីតកម្ម ខ្ពស់ជាងទឹកក្រូចឆ្មារទៅទៀត ដែលជួយការពារការរលួយកោសិកា និងកាត់បន្ថយហានិភ័យនៃជំងឺមហារីក និងជំងឺរ៉ាំរ៉ៃផ្សេងៗ។
ការបន្ថែមចំណិតក្រូចឆ្មារ ឬឈូសសំបកវាបន្តិចក្នុងអាហារប្រចាំថ្ងៃ គឺជាទម្លាប់ដ៏ល្អបំផុតសម្រាប់សុខភាពរយៈពេលវែង៕