យោងតាមការផ្សាយរបស់សារព័ត៌មានបរទេស ការខ្វែងគំនិតគ្នាក្នុងជីវិតគូជារឿងធម្មតា ប៉ុន្តែបើឈ្លោះគ្នាញឹកញាប់ពេក វាអាចនឹងបំផ្លាញក្ដីសុខដោយមិនដឹងខ្លួន។ ដើម្បីបំបែកវដ្តនេះ បុរសៗគួររៀន ញែកអារម្មណ៍ចេញពីបញ្ហា ដោយរក្សាភាពស្ងប់ស្ងាត់ និងមិនត្រូវឆ្លើយតបទាំងកំហឹងនៅពេលដៃគូនិយាយខ្លាំងៗឡើយ។
គន្លឹះសំខាន់បំផុតគឺ ការស្ដាប់ដោយចិត្តធ្ងន់ ព្រោះជួនកាលស្ត្រីគ្រាន់តែចង់ឱ្យគេយល់ចិត្ត ជាជាងការចង់បានដំណោះស្រាយភ្លាមៗ។ ជំនួសឱ្យការនិយាយថា “រឿងតូចតាចសោះ” ចូរប្រើពាក្យថា “ខ្ញុំយល់ពីអារម្មណ៍របស់អ្នក” វានឹងជួយបន្ធូរភាពតានតឹងបានយ៉ាងច្រើន។
ក្រៅពីនេះ ការដឹងពី ពេលដែលត្រូវឈប់សម្រាក ក៏ជាយុទ្ធសាស្ត្រល្អដែរ ប្រសិនបើអារម្មណ៍ឡើងដល់ចំណុចកំពូល ចូរផ្អាកការសន្ទនា ហើយសន្យាថានឹងត្រលប់មកពិភាក្សាវិញនៅពេលស្ងប់ចិត្ត ដើម្បីជៀសវាងការប្រើពាក្យសម្ដីបំផ្លិចបំផ្លាញ ឬលើកយកកំហុសចាស់ៗមកបញ្ឆេះកំហឹង។ ចូរចងចាំថា អ្នកមិនចាំបាច់ឈ្នះរាល់ពេលនោះទេ ព្រោះស្នេហាមិនមែនជាសមរភូមិឡើយ ការយោគយល់គ្នាទៅវិញទៅមកមានតម្លៃជាងការរកខុសត្រូវ។
ជាចុងក្រោយ ចូរព្យាយាម ស្វែងរកឫសគល់នៃបញ្ហា ព្រោះជម្លោះខ្លះកើតចេញពីអារម្មណ៍ដែលសន្សំទុកយូរមកហើយ ដូចជាអារម្មណ៍ថាត្រូវបានគេមើលរំលងជាដើម។
ទោះបីជាស្ថិតក្នុងស្ថានភាពតានតឹងក៏ដោយ កុំភ្លេច បង្ហាញក្ដីស្រឡាញ់ តាមរយៈពាក្យសម្ដីផ្អែមល្ហែម ឬការសុំទោសដោយស្មោះ។ ការប្រើពាក្យសម្ដីស្ថាបនា និងការរក្សាក្ដីស្រឡាញ់ឱ្យនៅខាងមុខជានិច្ច នឹងធ្វើឱ្យទំនាក់ទំនងរបស់អ្នកក្លាយជាកន្លែងដែលមានសុវត្ថិភាព និងមានសុភមង្គលបំផុត៕