យោងតាការផ្សាយរបស់សារព័ត៌មានបរទេសផ្នែកសុខភាពនិងអាហារូបត្ថម្ភ បានបង្ហាញថា ទោះបីជាផ្សិតជាអាហារដែលមានជីវជាតិ ប៉ុន្តែសម្រាប់មនុស្សមួយចំនួន វាអាចបង្កជាគ្រោះថ្នាក់ដល់សុខភាពយ៉ាងធ្ងន់ធ្ងរ។
ក្រុមដំបូងគេដែលត្រូវហាមឃាត់ដាច់ខាត គឺ អ្នកដែលមានប្រវត្តិអាឡែស៊ីជាមួយផ្សិត ព្រោះវាអាចបណ្ដាលឱ្យហើមមាត់ ពិបាកដកដង្ហើម ឬគ្រោះថ្នាក់ដល់ជីវិត។ ជាមួយគ្នានេះ អ្នកដែលមានបញ្ហារំលាយអាហារ (ដូចជាជំងឺពោះវៀន ឬជំងឺក្រពះ) ក៏គួរប្រយ័ត្នដែរ ព្រោះនៅក្នុងផ្សិតមានសារធាតុ Chitin ដែលពិបាករំលាយ និងអាចធ្វើឱ្យហើមពោះ ឬរាក។
ចំពោះ អ្នកជំងឺតម្រងនោមរ៉ាំរ៉ៃ ការញ៉ាំផ្សិតអាចជារឿងគ្រោះថ្នាក់ ដោយសារផ្សិតភាគច្រើនសម្បូរជាតិប៉ូតាស្យូមខ្ពស់ ដែលតម្រងនោមខ្សោយមិនអាចចម្រោះចេញបានទាន់ពេលវេលា។ សម្រាប់ ស្ត្រីមានផ្ទៃពោះ ស្ត្រីបំបៅដោះកូន និងកុមារតូចៗ គួរតែជៀសវាងជាពិសេសគឺ “ផ្សិតព្រៃ” ដែលមិនស្គាល់ប្រភពច្បាស់លាស់ ដើម្បីការពារហានិភ័យពីជាតិពុល ឬការចម្លងរោគផ្សេងៗ ព្រោះប្រព័ន្ធការពាររាងកាយ និងប្រព័ន្ធរំលាយអាហាររបស់ពួកគេនៅមានកម្រិត។
ជាចុងក្រោយ បុគ្គលដែលកំពុងប្រើប្រាស់ថ្នាំពេទ្យ ជាប្រចាំ (ជាពិសេសថ្នាំបញ្ចុះឈាម) ត្រូវពិគ្រោះជាមួយគ្រូពេទ្យមុននឹងញ៉ាំផ្សិតឱសថ ដូចជាផ្សិតលីជឺព្រោះវាអាចមានប្រតិកម្មជាមួយថ្នាំ ធ្វើឱ្យប្រសិទ្ធភាពថ្នាំប្រែប្រួល។ ការយល់ដឹងពីស្ថានភាពសុខភាពខ្លួនឯងមុននឹងទទួលទានផ្សិត គឺជាវិធីសាស្ត្រដ៏ល្អបំផុតដើម្បីទទួលបានអត្ថប្រយោជន៍ និងជៀសផុតពីគ្រោះថ្នាក់ដោយអចេតនា៕