យោងតាមការផ្សាយរបស់សារព័ត៌មានបរទេស នៅពេលឈានចូលដល់វ័យ ៤០ ឆ្នាំ ការរំលាយអាហារក្នុងរាងកាយចាប់ផ្ដើមថយចុះ ដែលធ្វើឱ្យខ្លាញ់ងាយកកកុញនៅតំបន់ពោះ។
ដើម្បីដោះស្រាយបញ្ហានេះ យុទ្ធសាស្ត្រទីមួយគឺ ការផ្ដោតលើរបបអាហារសម្បូរប្រូតេអ៊ីន (ដូចជា ស៊ុត ត្រី គ្រាប់ធញ្ញជាតិ) ដើម្បីកសាងម៉ាសសាច់ដុំ ព្រោះសាច់ដុំជួយដុតបំផ្លាញថាមពលបានច្រើន ទោះបីជាអ្នកកំពុងសម្រាកក៏ដោយ។ ទន្ទឹមនឹងនេះ អ្នកត្រូវ កាត់បន្ថយជាតិស្ករ និងកាបូអ៊ីដ្រាតចម្រាញ់ (បាយស នំប៉័ងស) ដែលជាមេខ្លោងធ្វើឱ្យអាំងស៊ុយលីនឡើងខ្ពស់ និងបង្កកខ្លាញ់ពោះ រួចងាកមកញ៉ាំអង្ករសំរូប ឬដំឡូងជ្វាជំនួសវិញ។
ក្រៅពីរបបអាហារ ការធ្វើ លំហាត់ប្រាណបែបចម្រុះ គឺចាំបាច់បំផុត ដោយរួមបញ្ចូលគ្នារវាងការហាត់បេះដូងដើម្បីដុតខ្លាញ់ និងការលើកទម្ងន់ ដើម្បីពង្រឹងសាច់ដុំ និងតុល្យភាពអ័រម៉ូន។ ជាមួយគ្នានេះ ការគ្រប់គ្រងភាពតានតឹង និងការគេងឱ្យបាន ៧ ម៉ោង គឺជាគន្លឹះមិនអាចខ្វះបាន ព្រោះការសម្រាកមិនគ្រាន់ធ្វើឱ្យអ័រម៉ូនស្ដ្រេស កើនឡើង ដែលជំរុញឱ្យអ្នកឃ្លានបង្អែម និងកកខ្លាញ់ពោះកាន់តែខ្លាំង។
ជាចុងក្រោយ អ្នកគួរ ពិនិត្យសុខភាព និងកម្រិតអរម៉ូនប្រចាំឆ្នាំ ជាពិសេសកម្រិតតេស្តូស្តេរ៉ូន។ ប្រសិនបើអ័រម៉ូនមានតុល្យភាព វានឹងជួយឱ្យកម្មវិធីសម្រកទម្ងន់របស់អ្នកទទួលបានជោគជ័យលឿនជាងមុន និងជួយកាត់បន្ថយអាការៈអស់កម្លាំងល្ហិតល្ហៃបានយ៉ាងមានប្រសិទ្ធភាព៕