យោងតាមការផ្សាយរបស់សារព័ត៌មានបរទេសផ្នែកសុខភាព ការបន្សាបជាតិពុលពិតប្រាកដ មិនមែនជាការចំណាយលុយទិញផលិតផលថ្លៃៗនោះទេ ប៉ុន្តែគឺជាការជួយសម្រួលដល់ប្រព័ន្ធបញ្ចេញកាកសំណល់ក្នុងរាងកាយឱ្យដំណើរការបានល្អ។
ជំហានដំបូងគឺ ការផឹកទឹកឱ្យបានគ្រប់គ្រាន់ ដើម្បីជួយឱ្យតម្រងនោមច្រោះឈាម និងបញ្ចេញជាតិពុលតាមទឹកនោមបានរហ័ស។ បន្ទាប់មក គឺការ បង្កើនការញ៉ាំជាតិសរសៃ (បន្លែ ផ្លែឈើ គ្រាប់ធញ្ញជាតិ) ដែលដើរតួដូចជា “អំបោសធម្មជាតិ” បោសសម្អាតកាកសំណល់ក្នុងពោះវៀន កុំឱ្យជាតិពុលជ្រាបចូលទៅក្នុងឈាមវិញ។
ចំណុចសំខាន់មួយទៀតដែលមនុស្សភាគច្រើនមើលរំលង គឺ ការគេងលក់ឱ្យស្កប់ស្កល់។ នៅពេលអ្នកគេង ខួរក្បាលនឹងធ្វើសកម្មភាពបូមលាងសម្អាតប្រូតេអ៊ីនពុលចេញពីកោសិកាសរសៃប្រសាទ ដែលជួយឱ្យការចងចាំល្អ និងការពារជំងឺវង្វេង។ ទន្ទឹមនឹងនេះ អ្នកត្រូវ កាត់បន្ថយគ្រឿងស្រវឹង និងជាតិស្ករ ដើម្បីកាត់បន្ថយបន្ទុករបស់ថ្លើម ទុកឱ្យថ្លើមមានសមត្ថភាពពេញលេញក្នុងដុតរំលាយជាតិពុលផ្សេងៗ និងមេតាបូលីសរាងកាយ។
ជាចុងក្រោយ ការធ្វើលំហាត់ប្រាណ គឺជាម៉ាស៊ីនរុញច្រានប្រព័ន្ធឡាំហ្វាទិច ឱ្យបញ្ចេញកាកសំណល់ចេញពីកោសិកាបានយ៉ាងរលូន តាមរយៈការកន្ត្រាក់សាច់ដុំ។ ការបណ្តុះទម្លាប់ទាំង ៥ នេះ គឺជាវិធីសាស្ត្របន្សាបជាតិពុលដែលចំគោលដៅ សន្សំសំចៃ និងមានប្រសិទ្ធភាពបំផុតសម្រាប់សុខភាពយូរអង្វែង៕