យោងតាមការផ្សាយរបស់សារព័ត៌មានបរទេស ការយល់ច្រឡំថាការរួមភេទក្នុងជីវិតពិតត្រូវតែដូចក្នុងភាពយន្ត អាចធ្វើឱ្យដៃគូមានសម្ពាធ និងបាត់បង់ក្ដីសុខ។
តាមពិតទៅ ការប្រាស្រ័យទាក់ទង គឺជាគន្លឹះសំខាន់បំផុត។ មនុស្សម្នាក់ៗមានចំណង់ខុសៗគ្នា ដូច្នេះអ្នកគួរជជែកជាមួយដៃគូឱ្យច្បាស់ពីអ្វីដែលចូលចិត្ត និងមិនចូលចិត្ត ជាជាងការធ្វើតាមសាច់រឿងដែលបានរៀបចំទុក។ ក្នុងជីវិតពិត ភាពស្រណុកសុខស្រួលសំខាន់ជាងភាពស្រស់ស្អាត។ ក្បាច់ពិបាកៗក្នុងរឿងច្រើនតែរៀបចំឡើងដើម្បីតែការថតរូបភាពឱ្យទាក់ទាញប៉ុណ្ណោះ ប៉ុន្តែវាអាចបង្កការឈឺចាប់ ឬរបួសក្នុងជីវិតពិត។
ចំណុចសំខាន់មួយទៀតគឺ ការរៀបចំបរិយាកាស និងសម្ភារៈ។ ជីវិតពិតមិនដូចក្នុងរឿងដែលអ្វីៗកើតឡើងដោយចៃដន្យនោះទេ ការរៀបចំបន្ទប់ឱ្យស្អាត បិទសំឡេងទូរស័ព្ទដើម្បីជៀសវាងការរំខាន និងការដាក់របស់ចាំបាច់ (ដូចជា ស្រោមអនាម័យ ឬទឹករំអិល) នៅជិតដៃ នឹងជួយឱ្យអារម្មណ៍ស្រស់ស្រាយ និងមិនដាច់ចង្វាក់។
ជាចុងក្រោយ កុំព្យាយាមប្រកួតប្រជែងរឿងពេលវេលា។ ក្នុងភាពយន្ត គេចំណាយពេលថតពេញមួយថ្ងៃ និងមានការកាត់តបច្ចេកទេសដើម្បីឱ្យមើលទៅហាក់ដូចជាយូរអង្វែង។ ការរួមភេទដែលល្អបំផុតគឺការផ្ដោតលើអារម្មណ៍គ្នាទៅវិញទៅមក និងភាពរីករាយតាមបែបធម្មជាតិ ជាជាងការធ្វើត្រាប់តាមអ្វីដែលមិនមែនជាការពិត៕