យោងតាមការផ្សាយរបស់សារព័ត៌មានបរទេស ការតុបតែងផ្ទះដោយរុក្ខជាតិអាចផ្ដល់ភាពស្រស់ស្រាយ ប៉ុន្តែការដាក់ខុសកន្លែងអាចធ្វើឱ្យរុក្ខជាតិងាប់ ឬខូចខាតទ្រព្យសម្បត្តិ។
ទីតាំងដំបូងដែលគួរជៀសវាងគឺ លើទូទឹកកក និងម៉ាស៊ីនមីក្រូវ៉េវ ព្រោះឧបករណ៍ទាំងនេះបញ្ចេញកម្ដៅធ្វើឱ្យដីស្ងួតលឿន រារាំងការបញ្ចេញខ្យល់របស់ម៉ាស៊ីន និងមានហានិភ័យកំពប់ទឹកនាំឱ្យឆ្លងចរន្តអគ្គិសនី។ ស្រដៀងគ្នានេះដែរ ការដាក់រុក្ខជាតិនៅជិត ឧបករណ៍អគ្គិសនី និងខ្សែភ្លើង គឺជាគ្រោះថ្នាក់បំផុត ព្រោះសំណើមពីការស្រោចទឹក ឬស្លឹកឈើដែលជ្រុះ អាចបណ្ដាលឱ្យមានសៀគ្វីខ្លី ឬខូចខាតឧបករណ៍ដោយអចេតនា។
ចំពោះការលូតលាស់វិញ អ្នកមិនគួរដាក់ផើងផ្កានៅជាប់ រន្ធម៉ាស៊ីនត្រជាក់ ឬម៉ាស៊ីនកម្ដៅ ឡើយ ព្រោះការប្រែប្រួលសីតុណ្ហភាពខ្លាំងធ្វើឱ្យរុក្ខជាតិបាត់បង់សំណើម។ ទីតាំង ជ្រុងងងឹតដែលគ្មានពន្លឺ ក៏មិនស័ក្តិសមដែរ ព្រោះវានឹងធ្វើឱ្យរុក្ខជាតិក្រៀមស្វិត និងលូតលាស់យឺត (លើកលែងតែរុក្ខជាតិធន់នឹងម្លប់ដូចជា អណ្ដាតនាគ)។ ផ្ទុយទៅវិញ ទីតាំងដែល ប៉ះពាល់នឹងកម្ដៅថ្ងៃខ្លាំងពេក ក៏អាចបំផ្លាញក្លរ៉ូហ្វីល ធ្វើឱ្យស្លឹកឆេះខ្លោច ឬមានចំណុចខ្មៅបានដែរ។ ដូច្នេះ ដើម្បីឱ្យរុក្ខជាតិលូតលាស់ល្អ អ្នកគួរស្រាវជ្រាវពីតម្រូវការពន្លឺ និងសំណើមរបស់វា រួចរក្សាគម្លាតសុវត្ថិភាពពីឧបករណ៍ប្រើប្រាស់ក្នុងផ្ទះឱ្យបានត្រឹមត្រូវ៕