យោងតាមការផ្សាយរបស់សារព័ត៌មានបរទេស ផ្ទុយពីការយល់ឃើញទូទៅថាអាហារមានថាមពលខ្ពស់សុទ្ធតែធ្វើឱ្យធាត់ អ្នកជំនាញអាហារូបត្ថម្ភបានបង្ហាញថា អាហារមួយចំនួនទោះបីមានកាឡូរីច្រើន ប៉ុន្តែវាមានគុណសម្បត្តិពិសេសក្នុងការជួយសម្រកទម្ងន់។
ផ្លែបឺរ និង ត្រីសាម៉ុង គឺជាឧទាហរណ៍ច្បាស់លាស់បំផុត ព្រោះវាសម្បូរទៅដោយអាស៊ីតខ្លាញ់មិនឆ្អែត (ខ្លាញ់ល្អ) និងអូមេហ្គា ៣ ដែលជួយកាត់បន្ថយកូឡេស្តេរ៉ុលអាក្រក់ និងធ្វើឱ្យអ្នកមានអារម្មណ៍ឆ្អែតបានយូរពី ៣ ទៅ ៥ ម៉ោង ការពារការញ៉ាំអាហារផ្ដេសផ្ដាស។ ជាមួយគ្នានេះ គ្រាប់ធញ្ញជាតិ ដូចជា Walnut ឬ Almond ក៏ផ្ដល់នូវប្រូតេអ៊ីន និងជាតិសរសៃដែលជួយគ្រប់គ្រងទម្ងន់បានយ៉ាងល្អ ប្រសិនបើញ៉ាំត្រឹមមួយក្ដាប់តូចក្នុងមួយថ្ងៃ។
ចំពោះក្រុមម្សៅ និងបង្អែមវិញ ដំឡូងបារាំងស្ងោរ គឺជាអាហារដែលមានសន្ទស្សន៍ឆ្អែតខ្ពស់បំផុត ដែលអាចប្រើជំនួសបាយដើម្បីកាត់បន្ថយការស្រូបយកជាតិស្ករលឿន និងជួយដល់បាក់តេរីល្អក្នុងពោះវៀនតាមរយៈ “ម្សៅធន់នឹងការរំលាយ”។ ចំណែកឯ សូកូឡាខ្មៅ (៧០% ឡើង) ទោះបីមានកាឡូរីខ្ពស់ ប៉ុន្តែវាសម្បូរទៅដោយសារធាតុ Polyphenols ដែលជួយពង្រឹងការរំលាយអាហារ និងកាត់បន្ថយសម្ពាធឈាម។ គន្លឹះសំខាន់គឺការទទួលទានក្នុងបរិមាណសមល្មម និងជ្រើសរើសវិធីចម្អិនតាមបែបស្ងោរ ឬដុត ដើម្បីរក្សាគុណតម្លៃអាហារូបត្ថម្ភ និងជួយឱ្យរាងកាយដុតបំផ្លាញជាតិខ្លាញ់បានកាន់តែមានប្រសិទ្ធភាព៕