យោងតាមការផ្សាយរបស់សារព័ត៌មានបរទេស អ្នកជំនាញអាហារូបត្ថម្ភបានក្រើនរំលឹកថា ផ្លែឈើមួយចំនួនទោះជាមានវីតាមីនខ្ពស់ ប៉ុន្តែវាក៏មានសន្ទស្សន៍គ្លីសេមិច (GI) ខ្ពស់ ដែលអាចធ្វើឱ្យជាតិស្ករក្នុងឈាមកើនឡើងយ៉ាងរហ័ស ប្រសិនបើទទួលទានលើសកម្រិត។
ឪឡឹក និងម្នាស់ ជាឧទាហរណ៍ចម្បងដែលសម្បូរជាតិទឹក និងផ្អែមខ្លាំង ដូច្នេះគួរញ៉ាំត្រឹមតែមួយចានចង្កឹះតូច ឬពីរចំណិតមធ្យមប៉ុណ្ណោះក្នុងមួយថ្ងៃ ដើម្បីជៀសវាងការឡើងជាតិស្ករដូចហោះ។ ចំពោះចេកទុំដែលមានចំណុចខ្មៅ និងស្វាយទុំ ក៏ត្រូវបានណែនាំឱ្យកម្រិតការទទួលទានត្រឹមមួយផ្លែ ឬមួយចានតូចដូចគ្នា ព្រោះវាជាដំណាក់កាលដែលម្សៅបានបំប្លែងទៅជាជាតិស្ករទាំងស្រុង ដែលងាយនឹងធ្វើឱ្យអ្នកលើសទម្ងន់ ឬប៉ះពាល់ដល់អ្នកជំងឺទឹកនោមផ្អែម។
ដោយឡែក ទំពាំងបាយជូរដែលជាផ្លែឈើមានគ្រាប់តូចៗងាយនឹងធ្វើឱ្យយើងញ៉ាំភ្លេចខ្លួនបំផុត ដូច្នេះគួរញ៉ាំត្រឹមតែ ១០ គ្រាប់ក្នុងមួយថ្ងៃទើបជាការប្រសើរ។ ដើម្បីកាត់បន្ថយការស្រូបយកជាតិស្ករលឿនពេក អ្នកគួរទទួលទានផ្លែឈើទាំងនេះបន្ទាប់ពីញ៉ាំអាហារដែលមានជាតិសរសៃរួច ឬញ៉ាំក្នុងបរិមាណតិចតួចបំផុត ដើម្បីរក្សាតុល្យភាពសុខភាពរាងកាយឱ្យបានមាំមួន និងមានរាងស្អាតជានិច្ច៕