បញ្ហាតម្រងនោម ជាពិសេសនៅដំណាក់កាលដំបូង ច្រើនតែមិនសូវបញ្ចេញរោគសញ្ញាច្បាស់លាស់នោះទេ ដែលគេច្រើនហៅថា ឃាតករលាក់មុខ ។ ទោះជាយ៉ាងណា នៅពេលដែលមុខងារតម្រងនោមចាប់ផ្តើមចុះខ្សោយ រាងកាយនឹងបង្ហាញសញ្ញាព្រមានមួយចំនួនដូចខាងក្រោម ៖
១. ការផ្លាស់ប្តូរទម្លាប់នៃការបត់ជើងតូច
-នោមញឹក៖ ជាពិសេសនៅពេលយប់។
-ទឹកនោមមានពពុះ៖ បង្ហាញថាមានជាតិប្រូតេអ៊ីន (Protein) ជ្រាបចេញមកក្នុងទឹកនោម។
-ទឹកនោមមានឈាម៖ ពេលតម្រងនោមខូច វាធ្វើឱ្យគ្រាប់ឈាមជ្រាបចូលទៅក្នុងទឹកនោម។
-បរិមាណទឹកនោមប្រែប្រួល ៖ អាចនោមតិចជាងមុន ឬច្រើនខុសធម្មតា។
២. ការហើមតាមផ្នែកផ្សេងៗនៃរាងកាយ
-ហើមភ្នែក៖ ជាពិសេសនៅពេលព្រឹកព្រលឹម (ដោយសារជាតិប្រូតេអ៊ីនជ្រាបចេញតាមទឹកនោមច្រើនពេក)។
-ហើមជើង និងប្រអប់ជើង៖ ដោយសារតម្រងនោមមិនអាចបញ្ចេញជាតិទឹក និងជាតិអំបិល (Sodium) ដែលលើសចេញពីរាងកាយ។
៣. អស់កម្លាំង និងខ្សោយខ្លាំង
-ភាពស្លេកស្លាំង៖ តម្រងនោមមានតួនាទីផលិតអ័រម៉ូនដើម្បីបង្កើតគ្រាប់ឈាមក្រហម។ ពេលវាមានបញ្ហា គ្រាប់ឈាមក្រហមថយចុះ ធ្វើឱ្យអ្នកមានអារម្មណ៍អស់កម្លាំង ល្ហិតល្ហៃ និងរងាញាក់។
-ពិបាកផ្ដោតអារម្មណ៍៖ ការកើនឡើងនូវជាតិពុលក្នុងឈាមធ្វើឱ្យប៉ះពាល់ដល់មុខងារខួរក្បាល។
៤. បញ្ហាស្បែក និងការរំលាយអាហារ
-រមាស់ស្បែក និងស្បែកស្ងួត៖ បណ្តាលមកពីការអតុល្យភាពនៃជាតិរ៉ែ និងជាតិពុលក្នុងឈាម។
-ញ៉ាំមិនដឹងរសជាតិ៖ មានអារម្មណ៍ថាធុំក្លិនលោហៈនៅក្នុងមាត់ ឬដង្ហើមធុំក្លិនអាម៉ូញាក់។
-ចង្អោរ ឬក្អួត៖ ជាសញ្ញានៃការកើនឡើងជាតិពុលខ្លាំងក្នុងឈាម (Uremia)។
៥. រោគសញ្ញាផ្សេងៗទៀត
-ឈឺចង្កេះ ឬចំហៀងខ្នង៖ ជាពិសេសប្រសិនបើមានគ្រួសក្នុងតម្រងនោម ឬការឆ្លងមេរោគ។
-លើសឈាម៖ បញ្ហាតម្រងនោម និងសម្ពាធឈាមខ្ពស់មានទំនាក់ទំនងគ្នាជិតស្និទ្ធបំផុត។
-រមួលក្រពើ៖ បណ្តាលមកពីការអតុល្យភាពនៃជាតិកាល់ស្យូម និងផូស្វ័រ។
ប្រសិនបើអ្នកមានរោគសញ្ញាទាំងនេះលើសពី ២ ឬ ៣ មុខក្នុងពេលតែមួយ អ្នកគួរតែទៅជួបគ្រូពេទ្យដើម្បី ពិនិត្យឈាម (Creatinine) និង ពិនិត្យទឹកនោម ៕