យោងតាមការផ្សាយរបស់សារព័ត៌មានបរទេសផ្នែកសុខភាព បានឱ្យដឹងថាការកកស្ទះច្រមុះឬតឹងច្រមុះមិនត្រឹមតែរំខានដល់ការដកដង្ហើមប៉ុណ្ណោះទេ ប៉ុន្តែថែមទាំងធ្វើឱ្យអ្នកគេងមិនលក់ទៀតផង។ ខាងក្រោមនេះជាវិធីសាស្ត្រធម្មជាតិដែលអ្នកអាចធ្វើបាននៅផ្ទះ៖
១. ស្រូបចំហាយទឹកក្តៅ៖ ដាក់ទឹកក្តៅក្នុងចានធំមួយ រួចប្រើកន្សែងគ្របក្បាល និងស្រូបចំហាយទឹកយឺតៗរយៈពេល ១០ នាទី ដើម្បីរំលាយស្លេស្ម។
២. ងូតទឹកក្តៅឧណ្ហៗ៖ ចំហាយទឹកក្នុងបន្ទប់ទឹកជួយផ្តល់សំណើម និងបើកផ្លូវដង្ហើមបានភ្លាមៗ។
៣. លាងច្រមុះដោយទឹកអំបិល៖ ប្រើទឹកអំបិល 0.9% លាងជម្រះធូលី និងមេរោគចេញពីប្រហោងច្រមុះ ១-២ ដងក្នុងមួយថ្ងៃ។
៤. ស្អំកន្សែងក្តៅ៖ យកកន្សែងក្ដៅឧណ្ហៗស្អំលើច្រមុះ និងថ្ពាល់ ដើម្បីជួយឱ្យចរន្តឈាមដើរស្រួល និងកាត់បន្ថយការហើមក្នុងច្រមុះ។
៥. ផឹកទឹកឱ្យបានច្រើន៖ ការរក្សាសំណើមក្នុងខ្លួនជួយឱ្យទឹករំអិលក្នុងច្រមុះរាវ មិនកកស្ទះខ្លាំង។
៦. ជៀសវាងគ្រឿងស្រវឹង និងកាហ្វេ៖ ភេសជ្ជៈទាំងនេះធ្វើឱ្យរាងកាយខ្សោះជាតិទឹក ដែលនាំឱ្យច្រមុះកាន់តែស្ងួត និងស្ទះលើសដើម។
៧. ប្រើម៉ាស៊ីនបង្កើនសំណើម៖ បើអ្នកគេងក្នុងបន្ទប់ម៉ាស៊ីនត្រជាក់ ខ្យល់ស្ងួតនឹងធ្វើឱ្យរលាកច្រមុះ។ ការដាក់ទឹកមួយកែវក្នុងបន្ទប់ក៏អាចជួយបានដែរ។
៨. គេងកល់ក្បាលឱ្យខ្ពស់៖ ការប្រើខ្នើយកល់ក្បាលឱ្យខ្ពស់ជាងខ្លួនបន្តិច ជួយឱ្យលំហូរខ្យល់ក្នុងច្រមុះរត់បានស្រួលពេលកំពុងគេង។
៩. ប្រើប្រេងសំខាន់ៗ៖ ស្រូបក្លិនប្រេងយូកាលីបតូស ឬប្រេងជីរអង្កាម ដើម្បីជួយឱ្យដកដង្ហើមបានស្រឡះភ្លាមៗ។
១០. ជៀសវាងភ្នាក់ងារបង្កអាឡែហ្ស៊ី៖ កាត់បន្ថយការប៉ះពាល់ជាមួយធូលី ផ្សែងបារី និងរោមសត្វ ដែលជាសត្រូវចម្បងនៃច្រមុះ៕