យោងតាមការផ្សាយរបស់សារព័ត៌មានបរទេសផ្នែកសុខភាព បានឱ្យដឹងថាការញ៉ាំស៊ុតគឺជាប្រភពប្រូតេអ៊ីនដ៏ពេញនិយម ប៉ុន្តែមនុស្សជាច្រើននៅតែមានការបារម្ភចំពោះផ្នែកពណ៌លឿង។ ការសិក្សាថ្មីៗបានបង្ហាញថា ទាំងស៊ុតទាំងមូល និងស៊ុតពណ៌ស សុទ្ធតែផ្ដល់អត្ថប្រយោជន៍ខុសៗគ្នា អាស្រ័យលើគោលដៅសុខភាពរបស់អ្នក។
ស៊ុតពណ៌ស៖ ជម្រើសសម្រាប់អ្នកសម្រកទម្ងន់ និងគ្រប់គ្រងជាតិខ្លាញ់
ស៊ុតពណ៌សគឺជាជម្រើសដ៏ល្អបំផុតសម្រាប់អ្នកដែលចង់កម្រិតកាឡូរី។ ស៊ុតពណ៌សចំនួន ២ គ្រាប់ ផ្ដល់ថាមពលត្រឹមតែ ៣៤ កាឡូរីប៉ុណ្ណោះ ដែលតិចជាងពាក់កណ្តាលនៃស៊ុតទាំងមូល ១ គ្រាប់ ប៉ុន្តែវាផ្ដល់ប្រូតេអ៊ីនរហូតដល់ ៧ ក្រាម។ អត្ថប្រយោជន៍ចម្បងរបស់វាគឺគ្មានជាតិខ្លាញ់ និងគ្មានកូឡេស្តេរ៉ុល ដែលសាកសមបំផុតសម្រាប់អ្នកដែលមានបញ្ហាលើសខ្លាញ់ក្នុងឈាម ឬអ្នកដែលត្រូវប្រុងប្រយ័ត្នខ្ពស់ចំពោះសុខភាពបេះដូង។
ស៊ុតទាំងមូល៖ ឃ្លាំងផ្ទុកវីតាមីន និងការកសាងរាងកាយ
ទោះបីជាស៊ុតលឿងមានកូឡេស្តេរ៉ុលក៏ដោយ ប៉ុន្តែវាជាកន្លែងផ្ដុំនូវសារធាតុចិញ្ចឹមស្ទើរតែទាំងអស់ដែលរាងកាយត្រូវការ។ ស៊ុតទាំងមូលសម្បូរទៅដោយវីតាមីន A, B12, D និងសារធាតុ Choline ដែលជួយទ្រទ្រង់ខួរក្បាល និងប្រព័ន្ធសរសៃប្រសាទ។ លើសពីនេះ ការសិក្សាបានរកឃើញថាការញ៉ាំស៊ុតទាំងមូលជួយបង្កើនកម្រិតកូឡេស្តេរ៉ុលល្អ និងជួយដល់ការលូតលាស់សាច់ដុំបានល្អជាងការញ៉ាំតែស៊ុតពណ៌ស ជាពិសេសបន្ទាប់ពីការហាត់ប្រាណ។
ការប្រុងប្រយ័ត្នដើម្បីសុវត្ថិភាព
ដើម្បីទទួលបានអត្ថប្រយោជន៍ពេញលេញ លោកអ្នកគួរចម្អិនស៊ុតឱ្យបានឆ្អិនល្អ (ផ្នែកស និងលឿងត្រូវតែរឹង) ដើម្បីបង្ការការចម្លងមេរោគ និងជួយឱ្យរាងកាយស្រូបយកវីតាមីន បានប្រសើរជាងមុន។ ការញ៉ាំស៊ុតឆៅអាចរារាំងការស្រូបយកវីតាមីន និងអាចបង្កគ្រោះថ្នាក់ដល់ប្រព័ន្ធរំលាយអាហារ៕