យោងតាមការផ្សាយរបស់សារព័ត៌មានបរទេសផ្នែកសុខភាព និងជីវិតប្រចាំថ្ងៃ បានឱ្យដឹងថាការចង់បានរាងកាយស្អាតមិនមែនជារឿងពិបាកទេ ប្រសិនបើអ្នកមាន “ប្រព័ន្ធ” ត្រឹមត្រូវ។ សម្រាប់ឆ្នាំ ២០២៦ នេះ បុរសៗគួរឈប់ផ្តោតលើលទ្ធផលបណ្តោះអាសន្ន ហើយងាកមកអនុវត្តជំហានដែលមាននិរន្តរភាពទាំង ៦ នេះវិញ៖
១. ប្តូរ “គោលដៅ” ទៅជា “អត្តសញ្ញាណ”
ឈប់គិតថា “ខ្ញុំចង់ស្រក ៥ គីឡូ” តែត្រូវគិតថា “ខ្ញុំគឺជាមនុស្សដែលស្រឡាញ់សុខភាព”។ នៅពេលអ្នកកំណត់អត្តសញ្ញាណបែបនេះ រាល់ការសម្រេចចិត្តប្រចាំថ្ងៃនឹងក្លាយជាសំណួរថា៖ “តើមនុស្សដែលស្រឡាញ់សុខភាព នឹងជ្រើសរើសញ៉ាំអាហារបែបណា?” ការផ្លាស់ប្តូរពីខាងក្នុង នឹងធ្វើឱ្យសកម្មភាពខាងក្រៅមាននិរន្តរភាព។
២. បង្កើតការទទួលខុសត្រូវ
កុំទុកឱ្យគោលដៅស្ថិតក្នុងគំនិតតែម្នាក់ឯង។ ត្រូវបង្កើតសម្ពាធវិជ្ជមានដោយការបង់ប្រាក់ចូលរៀនថ្នាក់ហាត់ប្រាណ ជួលគ្រូបង្វឹក ឬប្រកាសប្រាប់មិត្តភក្តិ។ ការមានអ្នកតាមដាន នឹងជួយឱ្យអ្នកមិនងាយបោះបង់នៅពេលដែលកម្លាំងចិត្តចុះខ្សោយ។
៣. ច្បាប់នៃភាពស៊ីសង្វាក់គ្នា
កុំហាត់ខ្លាំងពេកនៅថ្ងៃដំបូងរួចឈប់សម្រាកមួយសប្តាហ៍។ ត្រូវប្រើគោលការណ៍ ធ្វើឱ្យបានតិចបំផុតតែជាប់លាប់ ដូចជាការធ្វើ Push-up ១០ ដង ឬ Planking ៦០ វិនាទីរាល់ថ្ងៃ។ ការធ្វើតិចៗតែរាល់ថ្ងៃ គឺមានប្រសិទ្ធភាពជាងការធ្វើខ្លាំងៗតែម្តងម្កាល។
៤. លេខនៅលើជញ្ជីងមិនមែនជាសូចនាករពិតទេ
ទម្ងន់អាចឡើងចុះតាមកម្រិតទឹក និងសាច់ដុំ។ ត្រូវប្តូរមកវាស់ស្ទង់សមត្ថភាពរាងកាយវិញ ដូចជា៖ តើអ្នកអាចរត់បាន ១០ គីឡូម៉ែត្រដែរឬទេ? ឬអាចលើកទម្ងន់បានធ្ងន់ជាងមុនដែរឬទេ? ការឃើញកម្លាំងកើនឡើង ផ្ដល់នូវអារម្មណ៍វិជ្ជមានជាងការមើលលេខលើជញ្ជីង។
៥. កាត់បន្ថយការសម្រេចចិត្ត
ខួរក្បាលមនុស្សមានថាមពលកំណត់។ បើអ្នកត្រូវសម្រេចចិត្តរាល់ថ្ងៃថា “ញ៉ាំអី? ហាត់អី?” អ្នកនឹងអស់កម្លាំងចិត្ត។ ត្រូវធ្វើឱ្យវាទៅជាស្វ័យប្រវត្តិ៖ រៀបចំម្ហូបទុកមុនសម្រាប់មួយសប្តាហ៍ ដាក់ខោអាវហាត់ប្រាណក្បែរគ្រែ និងកំណត់ម៉ោងហាត់ឱ្យបានច្បាស់លាស់។
៦. ផ្តោតលើការស្តារកម្លាំង
រាងកាយមិនលូតលាស់ក្នុងកន្លែងហាត់ប្រាណទេ តែវាលូតលាស់នៅពេលអ្នកសម្រាក។ ត្រូវកំណត់គោលដៅគេងឱ្យបាន ៧-៨ ម៉ោង និងលាតសន្ធឹងសាច់ដុំ ១៥ នាទីមុនចូលគេង។ ការសម្រាកគ្រប់គ្រាន់ជួយឱ្យអ័រម៉ូនមានតុល្យភាព និងជួសជុលសាច់ដុំបានលឿនបំផុត។
ដំបូន្មាន: ឆ្នាំ ២០២៦ គឺជាឆ្នាំនៃការផ្លាស់ប្តូររបៀបរស់នៅ មិនមែនគ្រាន់តែផ្លាស់ប្តូររូបរាងខាងក្រៅនោះទេ។ ចាប់ផ្តើមពីជំហានតូចៗនៅថ្ងៃនេះ ដើម្បីក្លាយជា “អ្នក” ដែលល្អបំផុតនៅថ្ងៃស្អែក៕