កុំរំលង! អាការហើមដៃជើង អាចជាសញ្ញាព្រមាននៃជំងឺសរីរាង្គខាងក្នុងដ៏គ្រោះថ្នាក់

ការហើមដៃ និងជើង កើតឡើងដោយសារមានការដក់កកកុញនៃជាតិទឹកនៅក្នុងលិកានៃរាងកាយ ។ វាអាចជារោគសញ្ញានៃបញ្ហាសុខភាពខុសៗគ្នា ចាប់ពីបញ្ហាតូចតាច រហូតដល់ជំងឺរ៉ាំរ៉ៃ ។

ខាងក្រោមនេះ គឺជាមូលហេតុចម្បងៗដែលជួបប្រទះញឹកញាប់ ៖

១. បញ្ហាតម្រងនោម

នៅពេលតម្រងនោមដំណើរការមិនប្រក្រតី វាមិនអាចបញ្ចេញជាតិអំបិល (សូដ្យូម) និងទឹកដែលលើសចេញពីក្នុងឈាមបានឡើយ ។ ការលើសជាតិអំបិលនេះបង្កឱ្យមានសម្ពាធ រុញច្រានទឹកឱ្យដក់នៅតាមជាលិកា ជាពិសេសនៅប្រអប់ជើង និងករជើង ។

២. បញ្ហាបេះដូង

ប្រសិនបើបេះដូងចុះខ្សោយ វាមិនអាចច្របាច់ឈាមឱ្យហូរត្រឡប់ពីផ្នែកខាងក្រោមនៃរាងកាយមកវិញបានល្អឡើយ។ កត្តានេះធ្វើឱ្យឈាមកកស្ទះក្នុងសរសៃវ៉ែន និងបង្កជាការហើមជើង។ ប្រសិនបើហើមដោយសារបេះដូង អ្នកអាចនឹងមានអាការហត់ ឬដង្ហើមខ្លីអមជាមួយ។

៣. បញ្ហាថ្លើម

ជំងឺថ្លើមរ៉ាំរ៉ៃ (ដូចជាក្រិនថ្លើម) ធ្វើឱ្យរាងកាយខ្វះជាតិប្រូតេអ៊ីនម្យ៉ាងឈ្មោះថា Albumin។ ជាតិប្រូតេអ៊ីននេះមានតួនាទីរក្សាជាតិទឹកឱ្យនៅក្នុងសរសៃឈាម។ កាលណាវាចុះទាប ទឹកនឹងជ្រាបចេញពីសរសៃឈាមទៅក្នុងជាលិកា បង្កឱ្យហើមជើង និងពេលខ្លះហើមពោះ។

៤. សរសៃវ៉ែនចុះខ្សោយ

សន្ទះបិទបើកក្នុងសរសៃវ៉ែននៅជើងចុះខ្សោយ ធ្វើឱ្យឈាមមិនអាចហូរត្រឡប់ទៅបេះដូងវិញបានស្រួល ក៏កកស្ទះ និងហើមនៅតំបន់ប្រអប់ជើង។ នេះច្រើនជួបចំពោះអ្នកដែលឈរ ឬអង្គុយយូរពេក។

៥. កត្តារបៀបរស់នៅ និងរបបអាហារ

-ញ៉ាំប្រៃខ្លាំង៖ ជាតិអំបិលច្រើនធ្វើឱ្យរាងកាយរក្សាជាតិទឹក។

-ការប្រើប្រាស់ថ្នាំ៖ ថ្នាំបញ្ចុះសម្ពាធឈាមមួយចំនួន ថ្នាំស្តេរ៉ូអ៊ីត ឬថ្នាំបំបាត់ការឈឺចាប់ (ដូចជា Ibuprofen) អាចបណ្តាលឱ្យហើម។

-ការមានផ្ទៃពោះ៖ រាងកាយស្ត្រីមានផ្ទៃពោះរក្សាជាតិទឹកច្រើន ហើយស្បូនដែលរីកធំអាចសង្កត់សរសៃឈាម ធ្វើឱ្យហើមជើង។