យោងតាមការផ្សាយរបស់សារព័ត៌មានសុខភាពបរទេស ថ្ងៃឈប់សម្រាករយៈពេលវែងគឺជាឱកាសមាសដើម្បីស្តារកម្លាំងចិត្ត និងកាយ ប៉ុន្តែបើអ្នកមិនចេះបែងចែកពេលវេលាទេ អ្នកនឹងត្រឡប់មកធ្វើការវិញដោយភាពអស់កម្លាំងជាងមុន។ ដើម្បីចាប់ផ្តើមឆ្នាំថ្មីដោយភាពស្រស់ស្រាយ សូមសាកល្បងអនុវត្តតាមក្បួនទាំង ៦ នេះ៖
១. កំណត់ពេល “បិទទូរស័ព្ទ”៖ ពន្លឺពណ៌ខៀវពីទូរស័ព្ទរារាំងការផលិតមេឡាតូនីន ដែលធ្វើឱ្យអ្នកគេងមិនលក់។ ចូរឈប់ប្រើឧបករណ៍អេឡិចត្រូនិកយ៉ាងតិច ១ ម៉ោងមុនចូលគេង ហើយជំនួសមកវិញនូវការអានសៀវភៅ ឬស្តាប់តន្ត្រីស្រាលៗ ដើម្បីឱ្យខួរក្បាលបានសម្រាកពិតប្រាកដ។
២. រៀបចំផែនការសកម្មភាពរាងកាយ៖ ការអង្គុយមើលរឿង ឬជប់លៀងយូរពេក ធ្វើឱ្យចរន្តឈាមដើរមិនស្រួល។ អ្នកមិនចាំបាច់ហាត់ប្រាណខ្លាំងទេ គ្រាន់តែឧស្សាហ៍ក្រោកដើរ ប្តូរឥរិយាបថ ឬហាត់ប្រាណពត់ខ្លួនសាមញ្ញៗ ដើម្បីជួយឱ្យឈាមរត់បានសព្វសាច់ និងកាត់បន្ថយការហើមជើង។
៣. តិចនិក “គេងរសៀលឱ្យមានគុណភាព”៖ ការគេងរសៀលលើសពី ១ ម៉ោង អាចធ្វើឱ្យអ្នកងងុយពេញមួយថ្ងៃ។ រូបមន្តដែលល្អបំផុតគឺ “Power Nap” រយៈពេល ២០-៣០ នាទី (មុនម៉ោង ៣ រសៀល) ដែលវាគ្រប់គ្រាន់ក្នុងការជួយឱ្យខួរក្បាលមានភាពវៃឆ្លាតឡើងវិញដោយមិនប៉ះពាល់ដល់ការគេងយប់។
៤. ញ៉ាំអាហារដោយមានស្មារតី៖ កុំឱ្យភាពសប្បាយរីករាយធ្វើឱ្យអ្នកញ៉ាំលើសកម្រិតរហូតហើមពោះ។ ចូរទំពារឱ្យបានយឺតៗ និងដាក់ស្លាបព្រាចុះរាល់ពេលទំពារ ដើម្បីឱ្យខួរក្បាលដឹងថាពេលណាអ្នកឆ្អែតពិតប្រាកដ។ វិធីនេះជួយឱ្យប្រព័ន្ធរំលាយអាហារមិនធ្វើការធ្ងន់ពេក និងរក្សាថាមពលឱ្យស្ថិតស្ថេរ។
៥. ប្រើច្បាប់មាស ៨០/២០៖ កុំតឹងរ៉ឹងពេក ហើយក៏កុំធូររលុងពេក។ ចូរប្រើពេលវេលា ៨០% សម្រាប់ទម្លាប់ល្អ (គេងល្មម ញ៉ាំបន្លែ) និងទុក ២០% ទៀតសម្រាប់ភាពសប្បាយរីករាយ (ញ៉ាំបង្អែមដែលចូលចិត្ត ឬគេងយប់ជ្រៅខ្លះ)។ តុល្យភាពនេះនឹងធ្វើឱ្យអ្នកសម្រាកបានពេញលេញដោយមិនមានអារម្មណ៍ខុស។
៦. បង្កើតដំណាក់កាលអន្តរកាល៖ ១-២ ថ្ងៃមុនចូលធ្វើការវិញ ចូរចាប់ផ្តើមកែតម្រូវម៉ោងគេង និងម៉ោងក្រោកឱ្យដូចថ្ងៃធ្វើការធម្មតា។ ការធ្វើបែបនេះជួយឱ្យរាងកាយ និងចិត្តគំនិតរបស់អ្នកស៊ាំជាមុន ការពារអារម្មណ៍សោកសៅក្រោយថ្ងៃឈប់សម្រាកនិងធ្វើឱ្យអ្នកមានទំនុកចិត្តក្នុងការដោះស្រាយការងារភ្លាមៗ។
ការចាប់ផ្តើមឆ្នាំ ២០២៦ ដោយភាពខ្លាំងក្លា មិនមែនកើតចេញពីការសម្រាកដោយគ្មានសណ្តាប់ធ្នាប់នោះទេ ប៉ុន្តែវាគឺជាការសម្រាកដោយឆ្លាតវៃ។ ការថែរក្សាខ្លួនឯងនៅថ្ងៃឈប់សម្រាក គឺជាការវិនិយោគដ៏ល្អបំផុតសម្រាប់ភាពជោគជ័យពេញមួយឆ្នាំ៕