យោងតាមការផ្សាយរបស់សារព័ត៌មានសុខភាពបរទេស បានឱ្យដឹងថា សត្វសង្កើច គឺជាសត្វល្អិតតូចៗដែលរំខានដល់ការសម្រាក និងអាចបង្កជាបញ្ហាស្បែក។ ដើម្បីកម្ចាត់ពួកវាឱ្យអស់ពីផ្ទះអ្នកគួរអនុវត្តតាមជំហានសំខាន់ៗខាងក្រោម៖
១. ការសម្អាតដោយម៉ាស៊ីនបូមធូលី៖
ជំហានដំបូងដែលត្រូវធ្វើគឺប្រើម៉ាស៊ីនបូមធូលី បូមឱ្យសព្វផ្ទៃពូក ថ្នេរពូក និងតាមចន្លោះស៊ុមគ្រែ។ សត្វសង្កើចចូលចិត្តពួននៅក្នុងកន្លែងចង្អៀត និងងងឹត ដូច្នេះការបូមធូលីនឹងជួយដកយកទាំងសត្វសង្កើច និងពងរបស់វាចេញបានមួយកម្រិតធំ។
២. ការប្រើប្រាស់ថ្នាំបាញ់កម្ចាត់សត្វល្អិត៖
ប្រើប្រាស់ថ្នាំបាញ់ដែលត្រូវបានរចនាឡើងជាពិសេសសម្រាប់សម្លាប់សត្វសង្កើច។ ត្រូវប្រាកដថាអ្នកបាញ់នៅតាមកន្លែងដែលពួកវាចូលចិត្តពួនស្ងំ។ ទោះជាយ៉ាងណាក៏ដោយ ប្រសិនបើអ្នកសង្កេតឃើញថាមានសត្វសង្កើចរាតត្បាតខ្លាំងពេក រហូតដល់មិនអាចគ្រប់គ្រងបាន ការផ្លាស់ប្តូរទិញពូកថ្មីគឺជាជម្រើសដ៏ល្អបំផុតដើម្បីសុវត្ថិភាព។
៣. ការបោកគក់ និងការសម្ងួតដោយកម្ដៅ៖
មិនមែនមានតែពូកនោះទេដែលជាជម្រក សម្លៀកបំពាក់ ភួយ មុង និងស្រោមខ្នើយ ក៏ជាកន្លែងដែលពួកវាអាចតោងនៅបានដែរ។ អ្នកត្រូវយកក្រណាត់ទាំងនោះទៅបោកគក់ឱ្យបានស្អាត ហើយអ្វីដែលសំខាន់បំផុតគឺ ការសម្ងួតដោយប្រើកម្ដៅ ព្រោះកម្ដៅខ្ពស់គឺជាសត្រូវដ៏ធំដែលអាចសម្លាប់សត្វសង្កើច និងពងរបស់វាបានយ៉ាងងាយ។
៤. ការរៀបចំបរិស្ថានជុំវិញគ្រែ៖
សត្វសង្កើចអាចរីករាលដាលទៅកាន់គ្រឿងសង្ហារិមផ្សេងទៀតបានយ៉ាងលឿន។ អ្នកគួររៀបចំបន្ទប់គេងឱ្យមានសណ្តាប់ធ្នាប់ បោះចោលគ្រឿងសង្ហារិមចាស់ៗដែលមិនប្រើប្រាស់ គំនរសម្លៀកបំពាក់រញ៉េរញ៉ៃ ឬក្រណាត់ចាស់ៗដែលទុកចោលចោល។ ការកាត់បន្ថយជម្រកពួនស្ងំ នឹងជួយឱ្យការកម្ចាត់សត្វសង្កើចទទួលបានជោគជ័យយូរអង្វែង។
ក្រោយពេលបូមធូលីរួច ត្រូវយកកាកសំណល់ក្នុងម៉ាស៊ីនបូមទៅចោលក្នុងធុងសំរាមខាងក្រៅផ្ទះភ្លាមៗ ដើម្បីការពារកុំឱ្យពួកវាវារត្រឡប់ចូលក្នុងផ្ទះវិញ៕