យោងតាមការចុះផ្សាយរបស់សារព័ត៌មានសុខភាពបានឱ្យដឹងថា ជីរនាងវង គឺជាបន្លែគ្រឿងទេសដែលមានសមត្ថភាពអស្ចារ្យលើសពីការបន្ថែមរសជាតិអាហារ។ នៅក្នុងជីរនាងវងមានផ្ទុកនូវសមាសធាតុសកម្មដែលមានឥទ្ធិពលជួយឱ្យអារម្មណ៍ស្ងប់ស្ងាត់ និងជួយសម្រួលដល់ប្រព័ន្ធសរសៃប្រសាទឱ្យមានភាពធូរស្រាល។ ការទទួលទានជីរនាងវងជាប្រចាំ ជួយកាត់បន្ថយការផលិតអ័រម៉ូនស្ត្រេស ក្នុងរាងកាយ ដែលជាមូលហេតុចម្បងបង្កឱ្យមានភាពតានតឹង និងការថប់បារម្ភ។ វាមិនត្រឹមតែជួយឱ្យចិត្តស្ងប់ប៉ុណ្ណោះទេ ប៉ុន្តែថែមទាំងជួយឱ្យខួរក្បាលមានភាពស្រឡះល្អ និងបង្កើនសមត្ថភាពក្នុងការផ្ដោតអារម្មណ៍បានកាន់តែប្រសើរផងដែរ។
ចំពោះរបៀបប្រើប្រាស់ដើម្បីទាញយកអត្ថប្រយោជន៍មកកាត់បន្ថយភាពតានតឹង និងការថប់បារម្ភ អ្នកជំនាញណែនាំឱ្យប្រើប្រាស់ទាំងការទទួលទានក្នុងរបបអាហារ និងការឆុងជាភេសជ្ជៈ។ វិធីសាស្ត្រដែលងាយស្រួលបំផុតគឺការបន្ថែមជីរនាងវងស្រស់ៗទៅក្នុងម្ហូបអាហារដូចជា សម្លម្ជូរគ្រឿង សម្លការី ឬដាក់ក្នុងញាំបន្លែផ្សេងៗដើម្បីទទួលបានក្លិនប្រហើរដែលជួយឱ្យអារម្មណ៍ស្រស់ស្រាយ។ សម្រាប់អ្នកដែលមានបញ្ហាគេងមិនលក់ ឬថប់បារម្ភខ្លាំង អ្នកអាចយកស្លឹកជីរនាងវងស្រស់មួយក្ដាប់មកឆុងជាមួយទឹកក្ដៅទុកចោលប្រហែល ៥ នាទី រួចទទួលទានជាទឹកតែនៅពេលល្ងាច ឬមុនពេលចូលគេង ដែលវានឹងជួយឱ្យរាងកាយធូរស្រាល និងគេងលក់បានស្កប់ស្កល់។ ការស្រូបយកក្លិនប្រេងក្រអូបពីស្លឹកជីរនាងវងដែលបុកបន្តិចៗ ក៏ជាវិធីសាស្ត្រ “Aromatherapy” ដ៏ល្អក្នុងការជួយកាត់បន្ថយអាការឈឺក្បាល និងភាពតានតឹងពីការងារបានភ្លាមៗផងដែរ៕