ឆ្នាំថ្មី ២០២៦ មិនមែនគ្រាន់តែជាការផ្លាស់ប្តូរលេខលើប្រតិទិនឡើយ ប៉ុន្តែវាគឺជាឱកាសមាសសម្រាប់អ្នកក្នុងការ “បោសសម្អាត” បន្ទុកផ្លូវចិត្ត ដើម្បីស្វាគមន៍រឿងល្អៗ។ យោងតាមការផ្សាយរបស់សារព័ត៌មានបរទេសមួយបានឱ្យដឹងថា ដើម្បីឱ្យជីវិតកាន់តែស្រាល និងមានសុភមង្គល ចូរលះបង់ទម្លាប់ទាំង ៨ នេះចេញពីជីវិត៖
ការប្រកាន់ខ្ជាប់នូវ ភាពល្អឥតខ្ចោះ គឺជាបន្ទុកដែលធ្វើឱ្យអ្នកមិនហ៊ានចាប់ផ្តើមអ្វីថ្មី ដូច្នេះចូរអនុញ្ញាតឱ្យខ្លួនឯងធ្វើខុសខ្លះ ដើម្បីរៀនសូត្រ និងរីកចម្រើន។ ទន្ទឹមនឹងនេះ ឈប់ប្រើពាក្យថា “ខ្ញុំរវល់” ដើម្បីបង្កើនតម្លៃខ្លួនឯង តែត្រូវរៀនគ្រប់គ្រងពេលវេលា និងផ្តល់អាទិភាពដល់អ្វីដែលសំខាន់ពិតប្រាកដវិញ។ អ្វីដែលមិនគួរធ្វើបំផុតនោះគឺ ការប្រៀបធៀបខ្លួនឯងទៅនឹងអ្នកដទៃលើបណ្តាញសង្គម ព្រោះរូបភាពដែលអ្នកឃើញគ្រាន់តែជាជ្រុងដ៏ល្អបំផុតរបស់គេប៉ុណ្ណោះ វាមិនមែនជាការពិតទាំងស្រុងឡើយ។
ម្យ៉ាងទៀត ការចំណាយថាមពលដើម្បី ផ្គាប់ចិត្តមនុស្សគ្រប់គ្នា នឹងធ្វើឱ្យអ្នកបាត់បង់សេចក្តីសុខផ្ទាល់ខ្លួន ដូច្នេះចូររៀនកំណត់ព្រំដែន និងស្រឡាញ់ខ្លួនឯងឱ្យបានច្រើន។ កុំមានអារម្មណ៍ ខុសនៅពេលសម្រាក ព្រោះរាងកាយត្រូវការបញ្ចូលថាមពលឡើងវិញដើម្បីបន្តដំណើរទៅមុខ។ ចូររៀនបត់បែនតាមកាលៈទេសៈជាជាងការ ប្រកាន់ខ្ជាប់ផែនការតឹងរ៉ឹង ពេក និងត្រូវក្លាហានលះបង់ ការរំពឹងទុករបស់អ្នកដទៃ ដើម្បីដើរតាមបំណងប្រាថ្នាពិតរបស់បេះដូងអ្នក។
ចុងក្រោយ កុំភ្លេច បោសសម្អាតរបស់របរចាស់ៗ ដែលមិនប្រើប្រាស់ចេញពីផ្ទះ ព្រោះបរិយាកាសរញ៉េរញ៉ៃនឹងធ្វើឱ្យចិត្តរបស់អ្នកមិនស្រឡះ។ នៅពេលដែលអ្នកលះបង់បន្ទុកទាំង ៨ យ៉ាងនេះបាន នោះអ្នកនឹងមានកន្លែងទំនេរក្នុងចិត្តសម្រាប់ទទួលយកឱកាស និងថាមពលវិជ្ជមានថ្មីៗដែលនឹងចូលមកក្នុងឆ្នាំ ២០២៦ នេះយ៉ាងពិតប្រាកដ៕