យោងតាមការចុះផ្សាយរបស់សារព័ត៌មានសុខភាពបានឱ្យដឹងថាស៊ុតគឺជាអាហារមូលដ្ឋានដែលគ្រប់ផ្ទះតែងតែមាន ប៉ុន្តែការរក្សាទុកមិនបានត្រឹមត្រូវអាចធ្វើឱ្យស៊ុតឆាប់ខូច និងបាត់បង់សារធាតុចិញ្ចឹម។ ដើម្បីរក្សាស៊ុតឱ្យបានស្រស់ល្អ អ្នកគួរដាក់ស៊ុតក្នុងទូទឹកកកជាដាច់ខាត ព្រោះសីតុណ្ហភាពត្រជាក់ជួយទប់ស្កាត់ការរីកលូតលាស់នៃបាក់តេរី។ ចំណុចសំខាន់ដែលមេផ្ទះភាគច្រើនមើលរំលង គឺការដាក់ស៊ុតដោយ “យកផ្នែកស្រួចចុះក្រោម” និង “ផ្នែកធំឡើងលើ” ព្រោះផ្នែកធំមានរន្ធខ្យល់ដែលជួយឱ្យស៊ុតដកដង្ហើមបាន និងរក្សាផ្នែកលឿងឱ្យនៅចំកណ្តាលបានល្អ។
ក្រៅពីនេះ អ្នកមិនគួរលាងសម្អាតស៊ុតមុននឹងដាក់ចូលទូទឹកកកឡើយ ព្រោះវាអាចជម្រះស្រទាប់ការពារធម្មជាតិនៅសំបកស៊ុត ដែលធ្វើឱ្យមេរោគងាយជ្រាបចូលទៅខាងក្នុង។ បន្ថែមពីនេះ ការរក្សាទុកស៊ុតក្នុងប្រអប់ដើមរបស់វា ឬដាក់ក្នុងថតដែលនៅឆ្ងាយពីទ្វារទូទឹកកក នឹងជួយរក្សាសីតុណ្ហភាពឱ្យនៅថេរ ជៀសវាងការប៉ះទង្គិចខ្យល់ក្តៅរាល់ពេលបើកទ្វារ។ ការអនុវត្តតាមវិធីសាមញ្ញៗទាំងនេះ នឹងជួយឱ្យស៊ុតរបស់អ្នករក្សាភាពស្រស់បានរហូតដល់ ៣ ទៅ ៥ សប្តាហ៍ឯណោះ៕