ទឹក គឺជាសមាសធាតុដ៏សំខាន់បំផុតសម្រាប់រាងកាយមនុស្ស ដោយសាររាងកាយយើងមានផ្ទុកជាតិទឹកប្រមាណពី ៦០% ទៅ ៧០% ។ ការផឹកទឹកបានគ្រប់គ្រាន់ផ្តល់អត្ថប្រយោជន៍យ៉ាងច្រើនសន្ធឹកសន្ធាប់ដល់សុខភាពដូចខាងក្រោម ៖
១. ជួយដល់ដំណើរការខួរក្បាល និងថាមពល
–បង្កើនការចងចាំ និងការផ្តោតអារម្មណ៍ ៖ ការខ្វះជាតិទឹកសូម្បីតែបន្តិចបន្តួច ក៏អាចធ្វើឱ្យអ្នកមានអារម្មណ៍ងងុយដេក វិលមុខ និងពិបាកផ្ដោតអារម្មណ៍លើការងារ ។
–កាត់បន្ថយការឈឺក្បាល ៖ ការផឹកទឹកអាចជួយបង្ការ និងព្យាបាលការឈឺក្បាលដែលបណ្តាលមកពីការខ្វះជាតិទឹក (Dehydration)។
២. ជួយដល់ប្រព័ន្ធរំលាយអាហារ និងការបញ្ចេញចោល
–បង្ការការទល់លាមក ៖ ទឹកជួយឱ្យពោះវៀនដំណើរការបានល្អ និងធ្វើឱ្យលាមកទន់ ងាយស្រួលក្នុងការបញ្ចេញចោល។
–ជម្រះជាតិពុល ៖ ទឹកជួយឱ្យតម្រងនោមធ្វើការបានល្អក្នុងការបញ្ចេញជាតិពុលតាមរយៈទឹកនោម។
–បង្ការគ្រួសក្នុងតម្រងនោម ៖ ការផឹកទឹកច្រើនជួយរំលាយជាតិរ៉ែនៅក្នុងតម្រងនោម ដែលជាមូលហេតុបង្កឱ្យកើតគ្រួស។
៣. សម្រស់ និងស្បែក
–ស្បែកមានសំណើម៖ ទឹកជួយឱ្យស្បែកទន់ រលោង និងមានភាពយឺត (Elasticity) ដែលជួយពន្យារការកើតស្នាមជ្រីវជ្រួញ។
–បញ្ចេញជាតិពុលតាមស្បែក៖ ការបែកញើសជួយជម្រះមេរោគ និងភាពកខ្វក់ចេញពីមាត់រន្ធញើស។
៤. ការពារសន្លាក់ និងសាច់ដុំ
–កាត់បន្ថយការឈឺសន្លាក់៖ ទឹកគឺជាធាតុផ្សំដ៏សំខាន់នៃសារធាតុរំអិលនៅក្នុងសន្លាក់ឆ្អឹង ការពារមិនឱ្យឆ្អឹងកកិតគ្នា។
–បង្ការការរមួលក្រពើ ៖ ការរក្សាជាតិទឹកបានល្អ ជួយឱ្យសាច់ដុំធ្វើការបានពេញលេញ និងកាត់បន្ថយការហត់នឿយ។
៥. ជួយក្នុងការសម្រកទម្ងន់
–បង្កើនការដុតរំលាយអាហារ៖ ការផឹកទឹកជួយបង្កើនអត្រាដុតរំលាយកាឡូរី (Metabolism)។
–កាត់បន្ថយការឃ្លាន ៖ ការផឹកទឹកមួយកែវមុនពេលបាយ ៣០ នាទី ជួយឱ្យអ្នកមានអារម្មណ៍ឆ្អែត និងញ៉ាំអាហារបានតិចជាងមុន។