យោងតាមការចុះផ្សាយរបស់សារព័ត៌មានសុខភាពបានឱ្យដឹងថា សណ្ដែកខៀវ ឬសណ្ដែកបាយ គឺជាអាហារដ៏មានតម្លៃមហាសាលសម្រាប់អ្នកដែលមានបញ្ហាសម្ពាធឈាមឡើងខ្ពស់។ នៅក្នុងគ្រាប់សណ្ដែកខៀវសម្បូរទៅដោយសារធាតុចិញ្ចឹមសំខាន់ៗចំនួនបីគឺ ប៉ូតាស្យូម ម៉ាញ៉េស្យូម និងជាតិសរសៃ ដែលធ្វើការរួមគ្នាដើម្បីជួយឱ្យសរសៃឈាមមានភាពធូរស្រាល និងកាត់បន្ថយសម្ពាធឈាម។ ការសិក្សាបានបង្ហាញថា សារធាតុប៉ូតាស្យូមដែលមានក្នុងសណ្ដែកខៀវ ជួយឱ្យរាងកាយបញ្ចេញជាតិអំបិល លើសតាមរយៈទឹកនោម ដែលជាកត្តាចម្បងក្នុងការជួយរក្សាតុល្យភាពសម្ពាធឈាមឱ្យនៅស្ថិតស្ថេរ និងកាត់បន្ថយបន្ទុកការងាររបស់បេះដូង។
ចំពោះរបៀបប្រើប្រាស់ដើម្បីទាញយកអត្ថប្រយោជន៍មកបញ្ចុះសម្ពាធឈាម អ្នកជំនាញណែនាំឱ្យបញ្ចូលសណ្ដែកខៀវទៅក្នុងរបបអាហារប្រចាំថ្ងៃតាមវិធីសាមញ្ញៗ។ វិធីសាស្ត្រដែលល្អបំផុតគឺការយកសណ្ដែកខៀវមកស្ងោរញ៉ាំទាំងសំបក (ព្រោះសំបកសម្បូរជាតិសរសៃ និងសារធាតុប្រឆាំងអុកស៊ីតកម្ម) ដោយមិនត្រូវបន្ថែមជាតិស្ករ ឬអំបិលច្រើនពេកឡើយ។ អ្នកអាចយកសណ្ដែកខៀវដែលស្ងោរឆ្អិនទៅលាយជាមួយបាយ បន្ថែមក្នុងស៊ុបបន្លែ ឬធ្វើជាបង្អែមសុខភាពដោយប្រើទឹកឃ្មុំបន្តិចបន្តួចជំនួសស្ករស។ ការទទួលទានទឹកសណ្ដែកខៀវក្ដៅឧណ្ហៗជារៀងរាល់ព្រឹក ឬពេលល្ងាច មិនត្រឹមតែជួយសម្រួលដល់សម្ពាធឈាមប៉ុណ្ណោះទេ ប៉ុន្តែថែមទាំងជួយបន្សាបជាតិពុលក្នុងរាងកាយ ជួយដល់ការរំលាយអាហារ និងធ្វើឱ្យស្បែកមានភាពស្រស់ថ្លាផងដែរ៕