​ញ៉ាំផ្លែប៉ោម១ផ្លែក្នុង១ថ្ងៃ ជាវិធីសាស្ដ្រធម្មជាតិ ជួយដោះស្រាយបញ្ហាជំងឺទឹកនោមផ្អែម

យោងតាមការសិក្សាស្រាវជ្រាវដ៏ធំមួយក្នុងវិស័យសុខភាពបានបង្ហាញលទ្ធផលដែលគួរឱ្យភ្ញាក់ផ្អើលថា ការទទួលទានផ្លែប៉ោមត្រឹមតែមួយផ្លែក្នុងមួយថ្ងៃ អាចជួយកាត់បន្ថយហានិភ័យនៃជំងឺទឹកនោមផ្អែមប្រភេទ២ បានរហូតដល់ ២៨% បើធៀបនឹងអ្នកដែលមិនបានទទួលទានទាល់តែសោះ។ សូម្បីតែការញ៉ាំត្រឹមតែ ១ ទៅ ២ ផ្លែក្នុងមួយសប្ដាហ៍ ក៏នៅតែផ្ដល់ប្រសិទ្ធភាពការពាររាងកាយបានយ៉ាងល្អផងដែរ។ មូលហេតុដែលធ្វើឱ្យផ្លែប៉ោមមានសមត្ថភាពអស្ចារ្យបែបនេះ គឺដោយសារវត្តមាននៃសារធាតុ Polyphenol ដែលជួយបង្ការការខូចខាតដល់ជាលិកា ឬកោសិកា Beta នៅក្នុងលំពែង។ កោសិកា Beta នេះមានតួនាទីយ៉ាងសំខាន់ក្នុងការផលិតអរម៉ូនអាំងស៊ុយលីនដើម្បីគ្រប់គ្រងជាតិស្ករក្នុងឈាម ហើយតាមធម្មតាអ្នកដែលកើតជំងឺទឹកនោមផ្អែមប្រភេទ២ តែងតែជួបប្រទះនូវការខូចខាតកោសិកាដ៏សំខាន់មួយនេះ។

ចំពោះរបៀបប្រើប្រាស់ ឬការទទួលទានដើម្បីទទួលបានអត្ថប្រយោជន៍ខ្ពស់បំផុតក្នុងការបង្ការ និងគ្រប់គ្រងជំងឺទឹកនោមផ្អែម អ្នកជំនាញណែនាំឱ្យទទួលទានផ្លែប៉ោមទាំងសំបក ព្រោះសំបករបស់វាគឺជាកន្លែងដែលប្រមូលផ្ដុំទៅដោយសារធាតុ Polyphenol និងជាតិសរសៃច្រើនបំផុត។ វិធីសាស្ត្រដែលល្អបំផុតគឺការញ៉ាំផ្លែប៉ោមស្រស់ជាអាហារសម្រន់នៅចន្លោះពេលបាយ ឬញ៉ាំមុនពេលបាយកន្លះម៉ោង ដើម្បីជួយឱ្យរាងកាយឆាប់ឆ្អែត និងកាត់បន្ថយការឡើងខ្ពស់នៃជាតិស្ករក្រោយពេលញ៉ាំអាហាររួច។ អ្នកក៏អាចហាន់ផ្លែប៉ោមជាចំណិតស្តើងៗលាយជាមួយសាឡាដបន្លែ ឬញ៉ាំជាមួយយ៉ាអួរគ្មានជាតិស្ករដើម្បីបង្កើនរសជាតិ។ ទោះជាយ៉ាងណាក៏ដោយ អ្នកគួរជៀសវាងការទទួលទានទឹកផ្លែប៉ោមដែលកែច្នៃ ឬច្របាច់យកតែទឹកដោយបោះចោលកាក ព្រោះវាធ្វើឱ្យបាត់បង់ជាតិសរសៃ និងអាចធ្វើឱ្យកម្រិតជាតិស្ករក្នុងឈាមឡើងលឿនជាងការញ៉ាំផ្លែស្រស់​៕