យោងតាមការចុះផ្សាយរបស់សារព័ត៌មានសុខភាពបានឱ្យដឹងថា ខ្ទឹមក្រហមដែលជាគ្រឿងទេសមិនអាចខ្វះបានក្នុងផ្ទះបាយ គឺជាឱសថដ៏មានឥទ្ធិពលក្នុងការបង្ការជំងឺមហារីក។ មូលហេតុចម្បងដែលធ្វើឱ្យខ្ទឹមក្រហមមានសមត្ថភាពអស្ចារ្យបែបនេះ គឺដោយសារវាសម្បូរទៅដោយសមាសធាតុប្រឆាំងអុកស៊ីតកម្មខ្ពស់ ជាពិសេសគឺសារធាតុ Quercetin និង Anthocyanins ដែលដើរតួនាទីយ៉ាងសកម្មក្នុងការប្រឆាំងនឹងការកកើតរ៉ាឌីកាល់សេរី ។ រ៉ាឌីកាល់សេរីទាំងនេះគឺជាភ្នាក់ងារចម្បងដែលបង្កឱ្យមានការខូចខាតដល់ DNA និងជំរុញឱ្យកោសិកាធម្មតាប្រែប្រួលទៅជាកោសិកាមហារីក។ ការទទួលទានខ្ទឹមក្រហមជាប្រចាំ ជួយឱ្យរាងកាយបង្កើតរបាំងការពារដ៏រឹងមាំ និងកាត់បន្ថយការរលាករ៉ាំរ៉ៃនៅក្នុងជាលិកាផ្សេងៗ។
ចំពោះរបៀបប្រើប្រាស់ដើម្បីទាញយកអត្ថប្រយោជន៍ជាអតិបរមាសម្រាប់បង្ការជំងឺមហារីក អ្នកជំនាញណែនាំឱ្យទទួលទានខ្ទឹមក្រហមក្នុងទម្រង់ស្រស់ ឬចម្អិនឱ្យបានត្រឹមត្រូវបំផុត។ វិធីសាស្ត្រដែលផ្ដល់ផលល្អបំផុតគឺការហាន់ខ្ទឹមក្រហមជាចំណិតស្តើងៗ រួចទុកចោលប្រហែល ៥ ទៅ ១០ នាទីមុននឹងយកទៅចម្អិន ឬញ៉ាំ ដើម្បីឱ្យអង់ស៊ីមមានប្រយោជន៍បញ្ចេញសកម្មភាពបានពេញលេញ។ អ្នកអាចយកខ្ទឹមក្រហមទៅធ្វើជាគ្រឿងផ្សំក្នុងញាំ សាឡាដ ឬជ្រក់ខ្ទឹមដែលមិនសូវមានជាតិស្ករ ដើម្បីញ៉ាំជាអមជាមួយអាហារប្រចាំថ្ងៃ។ សម្រាប់អ្នកដែលចូលចិត្តញ៉ាំឆ្អិន ការដាក់ខ្ទឹមក្រហមចូលចុងក្រោយគេនៅក្នុងសម្ល ឬការឆាដោយប្រើកម្ដៅទាបក្នុងរយៈពេលខ្លី នឹងជួយរក្សាសារធាតុប្រឆាំងអុកស៊ីតកម្មមិនឱ្យបាត់បង់តាមរយៈកម្ដៅខ្លាំងពេក។ ការទទួលទានខ្ទឹមក្រហមត្រឹមតែ ២ ទៅ ៣ កំពឹសជារៀងរាល់ថ្ងៃ គឺជាទម្លាប់ដ៏ល្អបំផុតមួយក្នុងការថែរក្សាសុខភាពឱ្យជៀសឆ្ងាយពីជំងឺកាចសាហាវ៕