យោងតាមការចុះផ្សាយរបស់សារព័ត៌មានបរទេសបានឱ្យដឹងថា ស្ពៃក្ដោបមិនត្រឹមតែជាបន្លែដែលងាយស្រួលរក និងមានតម្លៃសមរម្យប៉ុណ្ណោះទេ ប៉ុន្តែវាគឺជាឱសថក្នុងការថែរក្សាសុខភាពតម្រងនោមឱ្យមានភាពល្អប្រសើរ។ មូលហេតុដែលធ្វើឱ្យស្ពៃក្ដោបជួយតម្រងនោម គឺដោយសារវាជាប្រភពដ៏សម្បូរបែបនៃវីតាមីន K, វីតាមីន C, វីតាមីន B6 និងជាតិសរសៃ។ អ្វីដែលកាន់តែពិសេសនោះ ស្ពៃក្ដោបមានកម្រិតប៉ូតាស្យូម និងផូស្វ័រទាប ដែលជាលក្ខខណ្ឌដ៏ល្អបំផុតសម្រាប់ជួយឱ្យតម្រងនោមមិនចាំបាច់ធ្វើការធ្ងន់ក្នុងការចម្រោះជាតិពុល និងជួយការពារសរីរាង្គមួយនេះពីការរលាក ឬបញ្ហាផ្សេងៗដែលនាំឱ្យខូចតម្រងនោម។
ចំពោះរបៀបប្រើប្រាស់ដើម្បីទទួលបានអត្ថប្រយោជន៍ជាអតិបរមាសម្រាប់តម្រងនោម អ្នកអាចយកស្ពៃក្ដោបទៅចម្អិនជាមុខម្ហូបបានយ៉ាងសម្បូរបែប ដូចជាការឆា ស្ងោរ ឬធ្វើជាស៊ុបបន្លែដែលមិនដាក់គ្រឿងប្រៃខ្លាំងពេក។ ការទទួលទានស្ពៃក្ដោបក្នុងទម្រង់ជាបន្លែស្រស់ក្នុងសាឡាត់ ឬការធ្វើជាទឹកបន្លែក្រឡុកក៏ជាជម្រើសដ៏ល្អប្រសើរផងដែរ ដើម្បីរក្សានូវអង់ស៊ីម និងវីតាមីនឱ្យបានពេញលេញ។
ទោះជាយ៉ាងណាក៏ដោយ ដើម្បីឱ្យតម្រងនោមទទួលបានការការពារកាន់តែរឹងមាំ អ្នកគួរទទួលទានស្ពៃក្ដោបឱ្យបាន ២ ទៅ ៣ ដងក្នុងមួយសប្តាហ៍ អមជាមួយការទទួលទានទឹកឱ្យបានគ្រប់គ្រាន់ ដែលវិធីនេះនឹងជួយឱ្យតម្រងនោមរបស់អ្នកដំណើរការបានយ៉ាងរលូន និងមានសុខភាពល្អអាយុយឺនយូរ៕