ការញ៉ាំកាហ្វេដោះគោ អាចធ្វើឱ្យធាត់ ប្រសិនបើអ្នកញ៉ាំមិនបានត្រឹមត្រូវ ឬញ៉ាំច្រើនពេក ។ កត្តាដែលកំណត់ថា ធាត់ ឬមិនធាត់ មិនមែននៅលើកាហ្វេ នោះទេ ប៉ុន្តែវាស្ថិតនៅលើគ្រឿងផ្សំដែលអ្នកដាក់បញ្ចូល ។
ខាងក្រោមនេះ ជាហេតុផល និងរបៀបញ៉ាំមិនឱ្យឡើងគីឡូ ៖
១. ហេតុអ្វីកាហ្វេដោះគោអាចធ្វើឱ្យអ្នកធាត់?
–ទឹកដោះគោខាប់ និងស្ករ ៖ កាហ្វេដោះគោដែលលក់នៅតាមផ្លូវ ឬហាងភាគច្រើន ប្រើទឹកដោះគោខាប់ក្នុងបរិមាណច្រើន ។ ទឹកដោះគោខាប់សម្បូរទៅដោយ ជាតិស្ករ និងខ្លាញ់បំលែង (Trans Fat) ដែលជាមូលហេតុចម្បងបង្កឱ្យដុះក្បាលពោះ និងឡើងទម្ងន់។
–កាឡូរីខ្ពស់ ៖ កាហ្វេខ្មៅ ១កែវមានត្រឹមតែ ២-៥ កាឡូរី ប៉ុណ្ណោះ ប៉ុន្តែកាហ្វេដោះគោ ១កែវ អាចមានកាឡូរីចាប់ពី ១៥០ ដល់ ៤០០ កាឡូរី (ស្មើនឹងបាយ ១ ចាន ឬលើស)។
–ការញ៉ាំអមជាមួយនំ ៖ ជាទូទៅ យើងតែងញ៉ាំកាហ្វេដោះគោជាមួយនំបុ័ង ឬនំផ្អែមៗ ដែលធ្វើឱ្យកម្រិតកាឡូរីកើនឡើងទ្វេដង។
២. របៀបញ៉ាំកាហ្វេដោះគោ មិនឱ្យធាត់
ប្រសិនបើអ្នកជាអ្នកចូលចិត្តកាហ្វេដោះគោ អ្នកអាចប្ដូរមកអនុវត្តវិធីទាំងនេះ ៖
–ប្រើទឹកដោះគោស្រស់ (Fresh Milk)៖ ប្ដូរពីទឹកដោះគោខាប់ មកប្រើទឹកដោះគោស្រស់ ប្រភេទគ្មានជាតិខ្លាញ់ (Non-fat) ឬខ្លាញ់ទាប (Low-fat)។
–ប្រើដោះគោរុក្ខជាតិ៖ សាកល្បងប្រើទឹកដោះគោអាល់ម៉ុន (Almond Milk) ឬទឹកដោះគោសណ្ដែកសៀងដែលគ្មានស្ករ ព្រោះវាមានកាឡូរីទាបខ្លាំង។
–កាត់បន្ថយស្ករ៖ កុម្ម៉ង់កាហ្វេបែប ស្ករតិច” (Low Sugar) ឬមិនដាក់ស្ករសោះ ។
–កុំញ៉ាំលើសពី ១ កែវក្នុងមួយថ្ងៃ ៖ ជាពិសេសជៀសវាងការញ៉ាំនៅពេលរសៀលជ្រៅ ឬពេលល្ងាច ព្រោះជាតិស្ករដែលមិនបានដុតរំលាយនឹងក្លាយជាខ្លាញ់ ។