ប្រយ័ត្ន! អាហារទាំងនេះ មានជាតិស្ករខ្ពស់ជាងអ្វីដែលអ្នកគិត

អាហារដែលមានជាតិស្ករច្រើនអាចបែងចែកជាពីរប្រភេទធំៗគឺ អាហារដែលមានស្ករពីធម្មជាតិ និង អាហារដែលមានស្ករកែច្នៃ (Added Sugar) ដែលគេបន្ថែមចូល ។

ខាងក្រោមនេះ គឺជាបញ្ជីអាហារ និងភេសជ្ជៈដែលសម្បូរជាតិស្ករខ្លាំង ដែលអ្នកគួរប្រុងប្រយ័ត្ន ៖

១. ភេសជ្ជៈ (ប្រភពនៃជាតិស្ករធំបំផុត)

នេះ គឺជាប្រភពនៃជាតិស្ករដែលគ្រោះថ្នាក់បំផុត ព្រោះរាងកាយស្រូបយកវាយ៉ាងលឿន ។

-ភេសជ្ជៈមានជាតិហ្គាស: ទឹកក្រូចកំប៉ុងគ្រប់ប្រភេទមានជាតិស្ករខ្ពស់ណាស់។

-ភេសជ្ជៈប៉ូវកម្លាំង (Energy Drinks): ពេញនិយមនៅស្រុកយើង ប៉ុន្តែសម្បូរស្ករ និងកាហ្វេអ៊ីន។

-ទឹកផ្លែឈើកំប៉ុង ឬដប: ភាគច្រើនមិនមែនជាទឹកផ្លែឈើសុទ្ធទេ គឺលាយស្ករ និងក្លិន។

-កាហ្វេ និងតែទឹកដោះគោ: កាហ្វេទឹកដោះគោទឹកកក តែបៃតង ឬតែគុជ ដែលលាយទឹកដោះគោខាប់ ឬស៊ីរ៉ូ មានកម្រិតស្ករខ្ពស់ហួសប្រមាណ ។

២. នំចំណី និងបង្អែម

-នំដុត: នំខេក (Cakes), នំដូណាត់ (Donuts), និងនំឃុកឃី (Cookies)។

-ការ៉េម: សម្បូរទាំងជាតិស្ករ និងជាតិខ្លាញ់។

-ស្ករគ្រាប់ និងសូកូឡា: លើកលែងតែសូកូឡាខ្មៅ (Dark Chocolate) ដែលមានភាគរយ កាកាវខ្ពស់ (៧០% ឡើង) ក្រៅពីនោះ គឺសម្បូរស្ករ ។

៣. អាហារកែច្នៃ និងស្ករដែលលាក់មុខ”

អាហារខ្លះ មិនមានរសជាតិផ្អែមខ្លាំងទេ តែមានជាតិស្ករច្រើន ដែលយើងនឹកស្មានមិនដល់ ៖

-ទឹកដោះគោជូរ (Yogurt): ពិសេសប្រភេទដែលមានរសជាតិផ្លែឈើ (Flavored Yogurt)។ គួរជ្រើសរើសប្រភេទ Plain Yogurt ឬ Greek Yogurt ជំនួសវិញ។

-ទឹកជ្រលក់ (Condiments): ទឹកប៉េងប៉ោះ (Ketchup), ទឹកម្ទេស, និងទឹកជ្រលក់សាច់អាំង (BBQ Sauce) សុទ្ធតែមានលាយស្ករដើម្បីឱ្យមានរសជាតិឆ្ងាញ់។

-ធញ្ញជាតិពេលព្រឹក (Breakfast Cereals): ភាគច្រើននៃធញ្ញជាតិសម្រាប់កុមារ គឺស្រោបដោយស្ករ ។

៤. ផ្លែឈើដែលមានជាតិស្ករខ្ពស់ (ស្ករពីធម្មជាតិ)

ទោះបីជាវាមានវីតាមីន ប៉ុន្តែអ្នកដែលមានជំងឺទឹកនោមផ្អែមគួរកំណត់បរិមាណ៖

-ផ្លែឈើក្រៀម: ដំណាប់ផ្លែឈើ, ទំពាំងបាយជូរក្រៀម (Raisins)។ ដោយសារវាត្រូវបានបូមទឹកចេញ ជាតិស្ករគឺកំហាប់ខ្លាំង ។

-ផ្លែឈើទុំខ្លាំង: ធុរេន, ខ្នុរ, ស្វាយទុំ, និងមៀន។

-ទឹកឃ្មុំ និងស្ករត្នោត: ទោះជាធម្មជាតិ ប៉ុន្តែវានៅតែជាស្ករដែលធ្វើឱ្យឡើងកម្រិតគ្លុយកូសក្នុងឈាម ។