ការទទួលបានសុខភាពល្អ មិនមែនកើតឡើងដោយចៃដន្យទេ តែវាជាលទ្ធផលនៃ «ការវិនិយោគប្រចាំថ្ងៃ» ទៅលើទម្លាប់រស់នៅរបស់យើង ។ ទោះបីជាយើងមិនអាចគ្រប់គ្រងកត្តាហ្សែនបាន ប៉ុន្តែយើងអាចគ្រប់គ្រងរបៀបរបបរស់នៅបាន ។
ខាងក្រោមនេះ គឺជាសសរស្តម្ភទាំង ៥ នៃទម្លាប់រស់នៅ ដើម្បីសុខភាពល្អ និងអាយុវែង ៖
១. របបអាហារ៖ «ចេះរើសចំណី ជីវិតមានន័យ»
អាហា រគឺជាថ្នាំដ៏ល្អបំផុត ។ ការញ៉ាំត្រឹមត្រូវមិនមែនមានន័យថាអត់ឃ្លានទេ តែគឺការញ៉ាំដោយឆ្លាតវៃ៖
-ក្បួនចានបាយសុខភាព៖ ក្នុងមួយចានបាយ គួរមានបន្លែ ៥០% (ពាក់កណ្តាលចាន), សាច់/ប្រូតេអ៊ីន ២៥%, និងបាយ/ម្សៅ ២៥%។
-កាត់បន្ថយ «ស ៣»៖ គឺ ស្ករ អំបិល និងខ្លាញ់។ ការញ៉ាំផ្អែមពេក ប្រៃពេក ឬខ្លាញ់ច្រើនពេក ជាប្រភពនៃជំងឺទឹកនោមផ្អែម លើសឈាម និងបេះដូង។
-ផឹកទឹកឱ្យបានគ្រប់គ្រាន់ ៖ យ៉ាងហោចណាស់១.៥ ទៅ២លីត្រ ក្នុងមួយថ្ងៃ ។ ទឹកជួយលាងសម្អាតជាតិពុល និងធ្វើឱ្យស្បែកភ្លឺថ្លា។
២. ការធ្វើចលនា៖ «រាងកាយបង្កើតមកសម្រាប់ការរើ»
មិនចាំបាច់ទាល់តែទៅ Gym ទើបហៅថាហាត់ប្រាណនោះទេ។
-សកម្មភាពប្រចាំថ្ងៃ៖ ដើរឱ្យបានច្រើន ធ្វើកិច្ចការផ្ទះ ឬឡើងជណ្តើរជំនួសជណ្តើរយន្ត។
-រយៈពេល៖ គួរហាត់ប្រាណឱ្យបែកញើសយ៉ាងតិច ៣០នាទី ក្នុងមួយថ្ងៃ (៥ថ្ងៃក្នុងមួយសប្តាហ៍)។
-អត្ថប្រយោជន៍៖ ជួយឱ្យបេះដូងរឹងមាំ ឆ្អឹងរឹង និងអារម្មណ៍ស្រស់ស្រាយ។
៣. ការគេង៖ «សាកថ្មឱ្យរាងកាយ»
ការគេងមិនគ្រប់គ្រាន់ គឺជាការបំផ្លាញសុខភាពដោយមិនដឹងខ្លួន។
-បរិមាណ៖ មនុស្សពេញវ័យត្រូវការការគេង ៧ ទៅ ៨ម៉ោង ក្នុងមួយយប់។
-គុណភាព៖ ចូលគេង និងក្រោកពីគេងឱ្យបានទៀងពេល។ ជៀសវាងការលេងទូរស័ព្ទមុនពេលគេង ព្រោះពន្លឺពណ៌ខៀវធ្វើឱ្យខួរក្បាលមិនងងុយ។
៤. សុខភាពផ្លូវចិត្ត៖ «ចិត្តសប្បាយ កាយរឹងមាំ»
ភាពតានតឹង (Stress) គឺជាឃាតករលាក់មុខដែលបង្កឱ្យមានជំងឺរ៉ាំរ៉ៃជាច្រើន។
-គ្រប់គ្រងស្ត្រេស៖ រៀនដោះលែងបញ្ហាខ្លះ។ អាចសាកល្បងវិធីសមាធិ ហាត់យូហ្គា ឬស្តាប់តន្ត្រី។
-ទំនាក់ទំនងសង្គម៖ ជួបជុំគ្រួសារ ឬមិត្តភក្តិដែលផ្តល់ថាមពលវិជ្ជមាន។ ការនៅឯកោពេក ធ្វើឱ្យប្រព័ន្ធភាពស៊ាំចុះខ្សោយ។
៥. ការការពារ និងពិនិត្យ៖ «ការពារប្រសើរជាងព្យាបាល»
-ជៀសវាងទម្លាប់ពុល៖ ឈប់ជក់បារី និងកាត់បន្ថយគ្រឿងស្រវឹង។
-ពិនិត្យសុខភាពប្រចាំឆ្នាំ៖ កុំចាំទាល់តែឈឺទើបទៅពេទ្យ។ ការពិនិត្យឈាមមួយឆ្នាំម្តង អាចឱ្យយើងដឹងមុននូវសញ្ញានៃជំងឺដូចជា ខ្លាញ់ក្នុងឈាម ទឹកនោមផ្អែម ឬបញ្ហាតម្រងនោម ដើម្បីទប់ស្កាត់ទាន់ពេល។
ដើម្បីសុខភាពល្អ ចាប់ផ្តើមពីថ្ងៃនេះដោយ៖ «ញ៉ាំបន្លែឱ្យច្រើន ដើរឱ្យបានឆ្ងាយ គេងឱ្យបានស្កប់ និងញញឹមឱ្យបានញឹកញាប់»៕