អាការៈឈឺធ្មេញជាបញ្ហាមួយដ៏គួរឱ្យរំខាន និងអាចផ្ដល់ភាពពិបាកបំផុតនៅពេលឈឺខ្លាំង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) អាការៈនេះអាចកើតមានឡើងដោយសារជំងឺអញ្ចាញធ្មេញ, ធ្មេញប្រេះ ឬប្រហោងដង្កូវស៊ី, ជំងឺពុកធ្មេញ, បញ្ហាទាក់ទងនឹងឬសធ្មេញ, ជំងឺសន្លាក់ឆ្អឹងថ្គាម និងការឆ្លងមេរោគ ជាដើម។ ថាតើយើងអាចដោះស្រាយបញ្ហាឈឺធ្មេញដោយខ្លួនឯងបានយ៉ាងដូចម្ដេចទៅ? កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធិភាពខ្ពស់បំបាត់អាការៈឈឺធ្មេញបានយ៉ាងឆាប់រហ័ស ៖

១. អំបិល និងម្រេច

អ្វីដែលអ្នកត្រូវធ្វើនោះ គឺគ្រាន់តែលាយអំបិល និងម្រេចក្នុងបរិមាណស្មើគ្នា រួចបន្ថែមទឹកធម្មតាប៉ុន្មានដំណក់ចូលរហូតដល់ក្លាយជាល្បាយខាប់ៗមួយ។ បន្ទាប់មកលាបល្បាយនេះផ្ទាល់លើធ្មេញដែលឈឺតែម្ដង និងទុកចោលសម្រាប់រយៈពេលពី ២ ទៅ ៣ នាទី។ អនុវត្តឱ្យបានយ៉ាងហោចណាស់ ២ ដងក្នុងមួយថ្ងៃ។ អំបិល និងម្រេច មានលក្ខណៈសម្បត្តិប្រឆាំងបាក់តេរី និងការរលាកដែលបណ្ដាលឱ្យឈឺធ្មេញ។

២. ខ្ទឹមស

ខ្ទឹមសមានលក្ខណៈសម្បត្តិជាថ្នាំសម្លាប់មេរោគបែបធម្មជាតិ និងអាចបំបាត់ការឈឺចាប់បានយ៉ាងប្រសើរបំផុត។ អ្វីដែលអ្នកត្រូវធ្វើ គឺបុកកំទេច ឬកិនខ្ទឹមសមួយកំពឹស ហើយបន្ថែមអំបិលបន្តិចចូល រួចដាក់វាលើធ្មេញដែលឈឺជាការស្រេច។ វិធីដ៏ងាយម្យ៉ាងទៀតនោះ គឺអ្នកអាចទំពារខ្ទឹមស ១ ឬ ២កំពឹសក្នុងមាត់តែម្ដង។

៣. ខ្ទឹមបារាំង

ខ្ទឹមបារាំងអាចជួយបំបាត់អាការៈឈឺធ្មេញដែលបណ្ដាលមកពីការឆ្លងមេរោគបានយ៉ាងប្រសើរ។ អ្វីដែលអ្នកត្រូវធ្វើ គឺគ្រាន់តែទំពារខ្ទឹមបារាំងឆៅរហូតដល់ធូរស្បើយពីការឈឺចាប់។ ប្រសិនបើអ្នកមិនចូលចិត្តរសជាតិនៃខ្ទឹមបារាំង អ្នកគ្រាន់តែយកខ្ទឹមបារាំងមួយបន្ទះសមល្មមដាក់ផ្ទាល់លើធ្មេញដែលឈឺ ហើយយកចេញវិញនៅពេលធូរស្បើយជាការស្រេច។

៤. តែជីអង្កាម

តែជីអង្កាមមានផ្ទុកសារធាតុ tannins ដែលជួយកាត់បន្ថយការហើម និងឈឺចាប់នៃធ្មេញបានយ៉ាងឆាប់រហ័ស។ អ្វីដែលអ្នកត្រូវធ្វើ គឺខ្ពុរមាត់ជាមួយទឹកតែជីអង្កាម។ ដើម្បីទទួលបានតែជីអង្កាម ចូរដាក់ស្លឹកជីអង្កាមស្ងួត ១ ស្លាបព្រាកាហ្វេក្នុងទឹកក្ដៅដាំពុះ ១ ពែង ហើយទុកចោលសម្រាប់រយៈពេលប្រមាណជា ២០ នាទី ជាការស្រេច។ កុំភ្លេចទុកឱ្យទឹកតែជីអង្កាមចុះត្រជាក់សិន សឹមយកមកខ្ពុរ។

៥. ខ្ពុរមាត់ជាមួយទឹករមៀត

រមៀត មានផ្ទុកលក្ខណៈសម្បត្តិសម្លាប់មេរោគបាក់តេរី និងព្យាបាល ដូច្នេះហើយទើបវាត្រូវបានគេយកមកប្រើប្រាស់ដើម្បីដោះស្រាយបញ្ហាឈឺធ្មេញថ្គាមទាល់។ អ្វីដែលអ្នកត្រូវធ្វើ គឺគ្រាន់តែបន្ថែមម្ស៉ៅរមៀតប៉ុន្មានចិបក្នុងទឹកធម្មតា ហើយខ្ពុរមាត់ជាមួយទឹកល្បាយនេះ។

ចំណុចគួរកត់សម្គាល់ ៖ ប្រសិនបើការឈឺចាប់នៅតែមិនបាត់ ទោះបីជាបានអនុវត្តនូវរូបមន្តបែបធម្មជាតិណាមួយហើយក៏ដោយនោះអ្នកគួរប្រញាប់ទៅជួបពិនិត្យជាមួយពេទ្យធ្មេញជាបន្ទាន់៕