ការស្ទះសរសៃឈាមបេះដូង គឺជាគ្រោះថ្នាក់មួយដែលទាមទារការព្យាបាលបន្ទាន់។ ការស្គាល់ និងដឹងពីសញ្ញាអាសន្នទាំងនេះអាចជួយសង្គ្រោះជីវិតអ្នកបានទាន់ពេលវេលា។
យោងតាមការណែនាំពី មន្ទីរពេទ្យកាល់ម៉ែត រោគសញ្ញាចម្បងៗដែលបង្ហាញពីការស្ទះសរសៃឈាមបេះដូង ឬជំងឺគាំងបេះដូងមានដូចជា៖
- ឈឺចុក ឬណែនដើមទ្រូង: នេះជារោគសញ្ញាដែលកើតមានញឹកញាប់បំផុត។ អ្នកជំងឺអាចមានអារម្មណ៍ចុកចាប់ ណែន ដូចមានអ្វីសង្កត់ ឬក្តៅដើមទ្រូងខ្លាំង។
- ថប់ដង្ហើម: មានអារម្មណ៍ថាដកដង្ហើមមិនគ្រប់គ្រាន់ ឬពិបាកដកដង្ហើម ទាំងកំពុងធ្វើសកម្មភាព ឬពេលសម្រាក។
- អារម្មណ៍ ឬសញ្ញាហត់ភ្លាមៗដោយគ្មានមូលហេតុ: ការមានអារម្មណ៍ហត់នឿយ ឬអស់កម្លាំងភ្លាមៗដោយមិនមានមូលហេតុច្បាស់លាស់ ក៏ជាសញ្ញាមួយដែលគួរប្រុងប្រយ័ត្នផងដែរ។
ចំណាំសំខាន់! ប្រសិនបើអ្នក ឬអ្នកដែលនៅជុំវិញអ្នកមានរោគសញ្ញាណាមួយដូចដែលបានរៀបរាប់ខាងលើនេះ សូមប្រញាប់ទៅជួបគ្រូពេទ្យ ឬទៅកាន់មន្ទីរពេទ្យដែលនៅជិតបំផុតជាបន្ទាន់ ដើម្បីទទួលបានការពិនិត្យនិងសង្គ្រោះបន្ទាន់ទាន់ពេលវេលា៕