រោគសញ្ញាលាក់កំបាំង ៖ កុំធ្វេសប្រហែសនៅពេលមានឈាមច្រមុះ ឬហឹងត្រចៀក ព្រោះអាចជាមហារីក

ជំងឺមហារីកច្រមុះ! Nasopharyngeal Cancer ជាជំងឺមហារីក ដែលកើតឡើងនៅផ្នែកខាងក្រោយច្រមុះ និងខាងលើបំពងក ដែលពាក្យបច្ចេកទេសឲ្យតំបន់នេះថា “Nasopharynx”។ នេះបើយោងតាមមន្ទីរពេទ្យកាល់ម៉ែតបានប្រកាសនាពេលកន្លងមក ។

ក) រោគសញ្ញា៖

នៅដំណាក់កាលដំបូង ជំងឺមហារីកច្រមុះ ពុំស្ដែងនូវសញ្ញាអ្វីដែលគួរឲ្យកត់សំគាល់ទេ។ រោគសញ្ញាមួយចំនួនដែលតម្រូវឲ្យអ្នកជំងឺមកពិគ្រោះជាមួយគ្រូពេទ្យជំនាញ មានដូចខាងក្រោម៖

– មានឡើងកូនកណ្តុលនៅក

– ឈាមច្រមុះ

– តឹងច្រមុះភាគច្រើនមួយចំហៀង

– សណ្តាប់មានការធ្លាក់ចុះនៅត្រចៀកម្ខាង

– ហឹងត្រចៀក

– ឈឺក្បាល

ខ) មូលហេតុបង្ក៖

មូលហេតុបង្កឲ្យកើតជំងឺមហារីកច្រមុះ នៅមិនទាន់ដឹងពិតប្រាកដ ប៉ុន្តែមានកត្តាមួយចំនួនដែលជំរុញឲ្យកើតមានជំងឺនេះ ៖

– ទីតាំងភូមិសាស្រ្ត ដូចជាប្រទេសចិនភាគខាងត្បូង ឬអាស៊ីខាងកើត

– ការបរិភោគអាហារដែលសម្បូរជាតិ Nitrosamine : អាហារដែលមានកម្រិតអំបិលខ្ពស់ ប្រលាក់ហាលឲ្យស្ងួតរួចអាំង (សាច់ ឬត្រី)

– អ្នកប្រកបរបរដែលទាក់ទងជាមួយឈើ-ជាងឈើ

– Epstein-Barr Virus

– ប្រវត្តិក្រុមគ្រួសារដែលកើតជំងឺនេះ(Nasopharyngeal Cancer)

គ) ការធ្វើរោគវិនិច្ឆ័យ៖

– ការឆ្លុះដោយម៉ាស៊ីនអង់ដូស្គប់ ប្រើកាំមេរ៉ាឆ្លុះចូលក្នុងច្រមុះរហូតដល់ផ្នែកខាងក្រោយ Nasopharynx

– ការច្រិបសាច់ : ត្រូវច្រិបសាច់នៅផ្នែកខាងក្រោយច្រមុះ ដើម្បីធ្វើការពិសោធន៍កោសិកាមហារីក Pathology and Immmuno-histo-chemistry

– ធ្វើ CT-Scan ឬ MRI

– Panendoscopy