ជំងឺស្ទះសរសៃឈាមបេះដូងត្រូវបានគេចាត់ទុកជា «ឃាតករស្ងប់ស្ងាត់» (Silent Killer) ព្រោះវាអាចបង្កឲ្យមានការស្លាប់ និងពិការភាពភ្លាមៗ។ ការយល់ដឹងពីកត្តាប្រឈមគឺជាជំហានដំបូងក្នុងការការពារខ្លួន។
យោងតាមការដាស់តឿនរបស់មន្ទីរពេទ្យកាល់ម៉ែត លោកអ្នកដែលមានលក្ខខណ្ឌដូចខាងក្រោម គួរតែយកចិត្តទុកដាក់ខ្ពស់ និងប្រញាប់ពិគ្រោះជាមួយគ្រូពេទ្យឯកទេស៖
១. កត្តាប្រឈម ៦ យ៉ាងនៃជំងឺស្ទះសរសៃឈាមបេះដូង
កត្តាទាំងនេះរួមមានទាំងលក្ខខណ្ឌសុខភាពរ៉ាំរ៉ៃ និងទម្លាប់រស់នៅមិនល្អ៖
- អ្នកដែលមានអាយុច្រើន: កត្តាអាយុកាន់តែច្រើន ហានិភ័យនៃការស្ទះសរសៃឈាមកាន់តែកើនឡើង។
- អ្នកដែលលើសជាតិខ្លាញ់ និងលើសទម្ងន់: កម្រិតខ្លាញ់ក្នុងឈាមខ្ពស់ (កូឡេស្តេរ៉ូល) និងទម្ងន់លើសគឺជាកត្តាជំរុញការកកស្ទះសរសៃឈាម។
- អ្នកដែលពិសាបារី: ការជក់បារីបំផ្លាញជញ្ជាំងសរសៃឈាមយ៉ាងធ្ងន់ធ្ងរ។
- អ្នកដែលមានជំងឺលើសឈាម: សម្ពាធឈាមខ្ពស់រ៉ាំរ៉ៃធ្វើឲ្យសរសៃឈាមខូចខាតកាន់តែលឿន។
- អ្នកដែលមានជំងឺទឹកនោមផ្អែម: ជំងឺទឹកនោមផ្អែមបង្កើនហានិភ័យនៃជំងឺសរសៃឈាមបេះដូងខ្ពស់បំផុត។
- អ្នកដែលមិនធ្វើលំហាត់ប្រាណ ឬប្រកបរបរនៅនឹងមួយកន្លែងយូរម៉ោង៖ ជាពិសេសបុគ្គលិកការិយាល័យ ការខ្វះចលនាជំរុញឲ្យមានការប្រឈមជំងឺកាន់តែខ្លាំង។
ប្រសិនបើលោកអ្នកមានកត្តាប្រឈមគ្រោះថ្នាក់ណាមួយដូចបានរៀបរាប់ខាងលើ សូមកុំបង្អង់យូរ! លោកអ្នកគួរតែទៅពិគ្រោះជាមួយគ្រូពេទ្យឯកទេសជំងឺបេះដូងដើម្បីស្វែងរកវិធីសាស្ត្រការពារ និងព្យាបាលទាន់ពេលវេលា សំដៅកាត់បន្ថយការស្លាប់ និងពិការភាពដែលបណ្តាលមកពីជំងឺស្ទះសរសៃឈាមបេះដូង៕