តើលោកអ្នកមានអារម្មណ៍ព្រួយបារម្ភហួសហេតុអំពីបញ្ហាប្រចាំថ្ងៃ ពិបាកគ្រប់គ្រងអារម្មណ៍ និងមិនអាចស្ងប់ស្ងាត់អស់រយៈពេលលើសពី ៦ ខែដែរឬទេ? នេះជាសញ្ញានៃ ជំងឺថប់បារម្ភ ដែលទាមទារការព្យាបាលពីគ្រូពេទ្យឯកទេសផ្លូវចិត្ត។
យោងតាមការចុះផ្សាយរបស់មន្ទីរពេទ្យកាល់ម៉ែត ជំងឺនេះមិនមែនគ្រាន់តែជាអារម្មណ៍បារម្ភធម្មតាទេ តែជាលក្ខខណ្ឌដែលប៉ះពាល់ដល់ជីវិតរស់នៅ។ សូមពិនិត្យមើលរោគសញ្ញា និងផលវិបាកទាំងនេះ៖
រោគសញ្ញា ៦ យ៉ាងដែលបង្ហាញថាអ្នកកំពុងថប់បារម្ភធ្ងន់ធ្ងរ
ជំងឺថប់បារម្ភមិនមែនបង្ហាញតែតាមរយៈអារម្មណ៍ទេ តែក៏ប៉ះពាល់ដល់រាងកាយផងដែរ៖
- ថប់បារម្ភ និងឆាប់ភ័យ៖ មានអារម្មណ៍ព្រួយបារម្ភខ្លាំង និងឆាប់ភិតភ័យ។
- ឆាប់ខឹងមួរម៉ៅ៖ អារម្មណ៍ប្រែប្រួលលឿន និងឆាប់មានកំហឹង។
- ចុករោយពេញខ្លួន៖ មានអាការៈចុករោយសាច់ដុំនិងតានតឹងពេញរាងកាយ។
- ល្ហិតល្ហៃអស់កម្លាំង៖ មានអារម្មណ៍នឿយហត់ និងបាត់បង់កម្លាំងកាយ។
- ពិបាកផ្តោតអារម្មណ៍៖ ប្រឈមនឹងការលំបាកក្នុងការតាំងចិត្ត ឬឆាប់ភ្លេចភ្លាំង។
- ប៉ះពាល់ដល់ការគេង៖ ពិបាកគេងលក់ ឬគេងមិនបានស្កប់ស្កល់។
២. ផលវិបាកបំផ្លាញអនាគត (បើមិនព្យាបាល)
ប្រសិនបើជំងឺថប់បារម្ភមិនត្រូវបានទទួលការព្យាបាលត្រឹមត្រូវទាន់ពេល វាអាចនាំឲ្យមានផលវិបាកធ្ងន់ធ្ងរ៖
- វិវត្តន៍ទៅរ៉ាំរ៉ៃ៖ អាការៈកាន់តែធ្ងន់ធ្ងរ និងពិបាកព្យាបាលនៅពេលក្រោយ។
- បាត់បង់សក្តានុពល៖ មិនអាចបញ្ចេញនូវសក្តានុពលពេញលេញក្នុងជីវិត ដូចជាការប្រកបរបរការងារ ឬលទ្ធផលនៃការសិក្សាមានការថយចុះ។
ប្រសិនបើលោកអ្នកមានអាការៈដូចបានរៀបរាប់ខាងលើ សូមកុំនៅស្ងៀម គួរតែឆាប់រួសរាន់ស្វែងរកការប្រឹក្សា និងការព្យាបាលពី វេជ្ជបណ្ឌិតឯកទេសជំងឺផ្លូវចិត្ត ដើម្បីបង្កើនឱកាសជាសះស្បើយកាន់តែលឿន និងឆាប់បានត្រឡប់ទៅរកជីវិតធម្មតាវិញ៕