ការទល់លាមក ឬ ការពិបាកបន្ទោបង់ គឺជាបញ្ហាទូទៅដែលមនុស្សស្ទើរគ្រប់គ្នាធ្លាប់ជួបប្រទះក្នុងជីវិតរស់នៅប្រចាំថ្ងៃ។ មនុស្សភាគច្រើនតែងតែគិតថាបញ្ហានេះគ្រាន់តែជារឿងធម្មតា ក៏ប៉ុន្តែការពិតដែលនៅពីខាងក្រោយវា គឺអាចជាការរំខានដល់សុខភាពទាំង ផ្លូវកាយ និង ផ្នែកអារម្មណ៍ ថែមទាំងលាក់ទុកនូវ ហានិភ័យធ្ងន់ធ្ងរ ជាច្រើនទៀត។
ការទល់លាមកមិនមែនជារឿងធម្មតាទេ!
ការទល់លាមករ៉ាំរ៉ៃទាមទារការពិគ្រោះ និង ពិនិត្យរុករកឫសគល់ ដែលបង្កឲ្យមានជំងឺនេះកើតឡើងមកបាន ដូចជា៖ ការឆ្លុះក្រពះ និងពោះវៀនធំ, ការធ្វើអេកូ និងថត Scanner ពោះ, ការធ្វើតេស្តឈាមជាដើម។
ផលវិបាកដ៏គ្រោះថ្នាក់នៃជំងឺទល់លាមក៖
ប្រសិនបើការទល់លាមកត្រូវបានបណ្តែតបណ្តោយយូរ ឬក្លាយជារ៉ាំរ៉ៃ វានឹងបង្កជាផលវិបាកធ្ងន់ធ្ងរដល់សុខភាពពោះវៀន និងបាតរបស់អ្នក៖
- ឫសដូងបាត៖ អាចបង្កទៅជា ជំងឺឫសដូងបាត (Hemorrhoids) ដែលបង្កការឈឺចាប់ និងធ្លាក់ឈាម។
- ដាច់រហែកបាត: អាចបណ្តាលឲ្យមាន ការដាច់រហែកភ្នាសរបស់បាត (Anal Fissure) បង្កជា ការធ្លាក់ឈាម និង មានការឈឺចាប់ យ៉ាងខ្លាំងពេលបន្ទោបង់។
- ខ្សោយពោះវៀនធំ: បើសិនជាមានការទល់លាមកនេះមានលក្ខណៈ រ៉ាំរ៉ៃយូរ វាក៏អាចបណ្តាលឲ្យទៅជាបញ្ហា ខ្សោយពោះវៀនធំ។
- មហារីកពោះវៀនធំ: នេះគឺជាហានិភ័យខ្ពស់បំផុត! ការទល់លាមករ៉ាំរ៉ៃគឺជាការ ប្រឈមមុខទៅនឹងជំងឺមហារីកពោះវៀនធំ ផងដែរ។
សូមកុំមើលរំលងបញ្ហាទល់លាមក! ត្រូវពិគ្រោះជាមួយគ្រូពេទ្យជំនាញ ដើម្បីការពារខ្លួនអ្នកពីផលវិបាកធ្ងន់ធ្ងរទាំងនេះ៕
(ប្រភព៖ មន្ទីរពេទ្យកាល់ម៉ែត)