ជំងឺក្រិនថ្លើម (Liver Cirrhosis) គឺជាជំងឺធ្ងន់ធ្ងរដែលវិវត្តន៍បន្តិចម្តងៗ ធ្វើឲ្យសាច់ថ្លើមខូចខាត។ ការយល់ដឹងពីរោគសញ្ញានៃដំណាក់កាលនីមួយៗគឺសំខាន់ណាស់ដើម្បីទទួលបានការព្យាបាលទាន់ពេល។
១. ដំណាក់កាលដំបូង (មិនសូវមានរោគសញ្ញាច្បាស់លាស់)
ជាទូទៅ ក្នុងដំណាក់កាលដំបូងៗ អ្នកជំងឺ មិនមានរោគសញ្ញាអ្វីឡើយ ឬក៏អាចមានរោគសញ្ញា មិនជាក់លាក់ មួយចំនួនដូចជា៖
- អស់កម្លាំង និង ល្ហិតល្ហៃ
- មិនឃ្លានចំណីអាហារ ជាដើម។
នេះជាចង្កោមរោគសញ្ញាដែលអាចឲ្យអ្នកជំងឺមិនចាប់អារម្មណ៍ ព្រោះថា សាច់ថ្លើមដែលនៅល្អកំពុងជួយជំនួសមុខងារថ្លើមដែលខូចខាត។
២. ដំណាក់កាលវិវត្តន៍ (សញ្ញាច្បាស់លាស់)
នៅពេលដែលសាច់ថ្លើមខូចខាតជាទូទៅ លើសពី ៥០% ឡើងទៅ អ្នកជំងឺអាចមានរោគសញ្ញាធ្ងន់ធ្ងរ និងច្បាស់លាស់ដូចជា៖
- ឡើងលឿង លើស្បែក និងភ្នែក (Jaundice)
- មានទឹកដក់ក្នុងស្រោមពោះ (ទាចទឹក) និង ហើមជើង
- ឡើងសរសៃឈាមក្រហម នៅលើស្បែក (Spider Angiomas)
- ក្អួតឈាម ឬ បត់ជើងជាលាមកឈាម ឬ ខ្មៅ (ដោយសារតែមានឈាមហូរក្នុងប្រព័ន្ធរំលាយអាហារ)
- វង្វេងវង្វាន់ ឬ សន្លប់បាត់ស្មារតី (ដែលជាសញ្ញានៃការខូចខាតខួរក្បាលដោយសារថ្លើម)។
ប្រសិនបើមានរោគសញ្ញាណាមួយខាងលើនេះ សូមប្រញាប់ទៅពិគ្រោះជាមួយគ្រូពេទ្យជំនាញដើម្បីទទួលបានការពិនិត្យ និងព្យាបាលទាន់ពេលវេលា៕
(ប្រភព៖ មន្ទីរពេទ្យមិត្តភាពខ្មែរ-សូវៀត)