ការគ្រប់គ្រងជំងឺរលាកក្រពះទាមទារការយកចិត្តទុកដាក់ខ្ពស់លើរបៀបរស់នៅ និងទម្លាប់នៃការញ៉ាំ។ ខាងក្រោមនេះគឺជាវិធីសាស្ត្រថែទាំខ្លួនឯងប្រកបដោយប្រសិទ្ធភាព៖
១. ទម្លាប់នៃការញ៉ាំត្រឹមត្រូវ
- ញ៉ាំទាន់ពេលវេលា: ត្រូវញ៉ាំអាហារឱ្យទៀងទាត់ និងមិនត្រូវបណ្ដោយឱ្យក្រពះទទេ។
- ជ្រើសរើសអាហារងាយរំលាយ: គួរញ៉ាំអាហារទន់ៗ និង ងាយស្រួលរំលាយ ហើយត្រូវទំពារអាហាររបស់អ្នកឱ្យបានហ្មត់ចត់ មុននឹងលេប។
- កំណត់បរិមាណអាហារ: បរិមាណអាហារដែលទទួលទានក្នុងពេលអាហារនីមួយៗមិនគួរលើសចំណុះឡើយ (ញ៉ាំតិចៗ តែញ៉ាំញឹក)។
២. ជៀសវាងអាហារ និងទម្លាប់ដែលបង្កការរលាក
- ជៀសវាងសារធាតុបង្កការរលាកក្រពះ: កុំប្រើប្រាស់ ថ្នាំតាមវេជ្ជបញ្ជា និង ថ្នាំបំបាត់ការឈឺចាប់សន្លាក់ មួយចំនួន (ដូចជា ថ្នាំអាស្ពីរីន, ថ្នាំស្តេរ៉ូអ៊ីត) ដោយគ្មានការណែនាំពីគ្រូពេទ្យ។
- ជៀសវាងភេសជ្ជៈ និងអាហារហឹរ: ត្រូវចៀសវាង អាហារហឹរ ពេក, ភេសជ្ជៈកាបូន (ទឹកក្រូច), ភេសជ្ជៈមានជាតិអាល់កុល, និង អាហារ ឬភេសជ្ជៈដែលមានជាតិកាហ្វេអ៊ីន ខ្ពស់ ដូចជា សូកូឡា, តែ និង កាហ្វេ។
- ឈប់ជក់បារី: ការជក់បារី ធ្វើឱ្យអាការៈរលាកក្រពះកាន់តែធ្ងន់ធ្ងរ។
៣. ការគ្រប់គ្រងអារម្មណ៍ និងលំហាត់ប្រាណ
- គ្រប់គ្រងភាពតានតឹង: ប្រសិនបើអ្នកមានអារម្មណ៍តានតឹង (Stress) សូមព្យាយាមកាត់បន្ថយភាពតានតឹង ដោយអនុវត្តសកម្មភាពដូចជា មើលកុន, ស្តាប់តន្ត្រី, ធ្វើសមាធិ ឬ ហាត់សាច់ដុំ (លំហាត់ប្រាណសម្រួលសាច់ដុំ)។
- ធ្វើលំហាត់ប្រាណ: ត្រូវធ្វើលំហាត់ប្រាណឱ្យបានទៀងទាត់ ដើម្បីទ្រទ្រង់សុខភាពទូទៅ និងកាត់បន្ថយភាពតានតឹង។
៤. ការប្រើប្រាស់ថ្នាំ និងការតាមដាន
- លេបថ្នាំបន្សាបជាតិអាស៊ីត: អ្នកអាចលេបថ្នាំបន្សាបជាតិអាស៊ីត ១-២ ស្លាបព្រាបាយ ឬ ១-២ គ្រាប់ (ទំពារមុនពេលលេប) ៤ ដងក្នុងមួយថ្ងៃ៖ ពេលព្រឹក, ថ្ងៃត្រង់, ល្ងាច ១ ម៉ោងក្រោយអាហារ និង មុនពេលចូលគេង។ ប្រសិនបើឈឺក្រពះមុនម៉ោងកំណត់ អ្នកអាចលេបថ្នាំបន្ថែមទៀត។ គួរលេបថ្នាំនេះបន្តបន្ទាប់គ្នាយ៉ាងតិច ៤-៨ សប្តាហ៍។
- លេបថ្នាំវេជ្ជបញ្ជា: ត្រូវលេបថ្នាំរបស់អ្នកឱ្យបានទៀងទាត់ តាមការណែនាំរបស់គ្រូពេទ្យរបស់អ្នក។
- ទៅជួបគ្រូពេទ្យ: ប្រសិនបើការធ្វើតាមវិធីសាស្ត្រខាងលើនេះ មិនធ្វើឱ្យរោគសញ្ញារបស់អ្នកប្រសើរឡើងទេ អ្នកគួរតែទៅជួបគ្រូពេទ្យនៅមន្ទីរពេទ្យដើម្បីធ្វើរោគវិនិច្ឆ័យច្បាស់លាស់ និងព្យាបាលបន្ថែម៕
(ប្រភព៖ បរទេស)