ខណៈដែលអ្នកខ្លះព្យាយាមឥតឈប់ដើម្បីអាចស្រកទម្ងន់ អ្នកដទៃទៀតបែរជាពិបាកនឹងឡើងទម្ងន់ទៅវិញ។ គួរឱ្យអស់សំណើចណាស់ដែលអាហារកញ្ចប់ ឬអាហារមានផ្ទុកជាតិខ្លាញ់មិនល្អគ្មានប្រសិទ្ធិភាពចំពោះអ្នកដែលមិនអាចកើនទម្ងន់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណា ការចង់កើនទម្ងន់ និងឡើងសាច់ដុំគ្មានអ្វីពិបាកសោះឡើយ! ដំណោះស្រាយ គឺសាមញ្ញមែនទែន ដោយគ្រាន់តែទទួលទានអាហារមានផ្ទុកជាតិខ្លាញ់ល្អៗ និងប្រូតេអ៊ីនជាការស្រេច។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួរទទួលទាន ដើម្បីកើនទម្ងន់ និងឡើងសាច់ដុំឆាប់រហ័ស ៖
១. ទឹកដោះគោស្រស់
ទឹកដោះគោ គឺមានផ្ទុកសម្បូរទៅដោយប្រូតេអ៊ីន, ជាតិស្ករ និងជាតិខ្លាញ់ ក៏ដូចជាកាល់ស្យូម និងវិតាមីនល្អៗ។ ការសិក្សាស្រាវជ្រាវជាច្រើនបានបង្ហាញថា ការទទួលទានទឹកដោះគោគ្មានជាតិខ្លាញ់ ក្រោយធ្វើលំហាត់ប្រាណជួយបង្កើនសាច់ដុំឱ្យកាន់តែមានប្រសិទ្ធិភាព។ ប្រសិនបើអ្នកមិនហាត់ប្រាណអ្វីទេនោះ គ្រាន់តែទទួលទានទឹកដោះគោស្រស់ ១ ឬ ២ កែវជាមួយអាហារក៏បានដែរ។
២. ផ្លែបឺរ
ជាប្រភពនៃជាតិខ្លាញ់សុខភាពល្អ និងសារធាតុចិញ្ចឹមដែលផ្ដល់អត្ថប្រយោជន៍ប្រសើរបំផុតសម្រាប់សុខភាព។ វាគ្មានផ្ទុកជាតិកាល់ឡូរីច្រើនទេ ប៉ុន្តែនៅតែជាអាហារដ៏ល្អបំផុតមួយជួយឱ្យឡើងទម្ងន់។ ផ្លែបឺរក៏មានផ្ទុកសម្បូរទៅដោយវីតាមីនចាំបាច់ដូចជា C, E និង K ជួយឱ្យឡើងទម្ងន់ និងរក្សាសុខភាពសាច់ដុំ។
៣. សាច់ក្រហម
ជាអាហារដែលប្រសើរបំផុតជួយឱ្យកើនទម្ងន់ និងឡើងសាច់ដុំឆាប់រហ័ស។ សាច់ក្រហមមានផ្ទុក leucine និង creatine ដែលជាសារធាតុចិញ្ចឹមចាំបាច់សម្រាប់សាច់ដុំ និងការកើនឡើងនូវជាលិកាសាច់ដុំថ្មី។ សាច់ក្រហមក៏ជាប្រភពនៃប្រូតេអ៊ីន និងជាតិខ្លាញ់ដែលជួយអ្នកឱ្យកើនទម្ងន់យ៉ាងប្រសើរផងដែរ។ ទោះជាយ៉ាងណា ការទទួលទានច្រើនពេកក៏មិនល្អដែរសម្រាប់សុខភាព។
៤. សណ្ដែកសៀង
ជាប្រភពដ៏ប្រសើរនៃវីតាមីន K, ជាតិដែក និងផូស្វ័រ។ ជាតិដែកជួយរក្សាទុក និងដឹកនាំអុកស៊ីសែនឆ្លងកាត់ឈាម និងសាច់ដុំ។ សណ្ដែកសៀងក៏មានផ្ទុកសម្បូរទៅដោយសារធាតុប្រឆាំងអុកស៊ីតកម្មដ៏មានឥទ្ធិពល និងជួយបង្កើនសុខភាពរាងកាយ ក៏ដូចជាកម្លាំងឡើងវិញក្រោយលំហាត់ប្រាណ។
៥. តៅហ៊ូ
តៅហ៊ូធ្វើឡើងពីសណ្ដែកសៀងដែលមានឥទ្ធិពលគួរឱ្យកត់សម្គាល់សម្រាប់មុខងារសាច់។ តៅហ៊ូក៏ជាប្រភពដ៏ប្រសើរនៃប្រូតេអ៊ីន, leucine និងកាល់ស្យូមដែលសាច់ដុំត្រូវការចាំបាច់ដើម្បីបង្កើន និងរក្សាមុខងារត្រឹមត្រូវ។
៦. ត្រីសាលម៉ុន និងត្រីសម្បូរខ្លាញ់
ប្រភពដ៏ល្អបំផុតមួយនៃប្រូតេអ៊ីនគុណភាពខ្ពស់ និងជាតិខ្លាញ់សុខភាពល្អនោះ គឺត្រីសម្បូរខ្លាញ់។ ត្រីដូចជា ត្រីសាលម៉ុន និងធូណា មិនត្រឹមតែជួយក្នុងការបង្កើនសាច់ដុំប៉ុណ្ណោះទេ ប៉ុន្តែផ្ដល់អត្ថប្រយោជន៍ចំពោះរាងកាយទាំងមូលតាមរយៈអាស៊ីតខ្លាញ់អូមេហ្គា ៣ ដែលវាមានផ្ទុក។ រួមបញ្ចូលវាជាមួយបាយ និងបន្លែ។
៧. ស៊ុត
ស៊ុត ជាប្រភេទនៃអាហារដ៏ប្រសើរបំផុតសម្រាប់ការកសាងបង្កើនសាច់ដុំមានសុខភាពល្អ។ ស៊ុតមានផ្ទុកសម្បូរទៅដោយជាតិប្រូតេអ៊ីនគុណភាពខ្ពស់ និងជាតិខ្លាញ់សុខភាពល្អ។ ដូច្នេះដើម្បីអាចកើនទម្ងន់ និងឡើងសាច់ដុំឆាប់រហ័ស ក៏ដូចជារក្សាបាននូវសុខភាពរាងកាយរឹងមាំ ចូរទទួលទានស៊ុតឱ្យបាន ៣ គ្រាប់ក្នុងមួយថ្ងៃ។
៨. អង្ករសម្រូប
មានផ្ទុកសម្បូរទៅដោយជាតិសសៃ, វីតាមីន និងជាតិរ៉ែ ខ្ពស់ជាងអង្ករធម្មតា។ ការទទួលទានបាយអង្ករសម្រូបលាយជាមួយនឹងបន្លែ ក៏ដូចជាអាហារសម្បូរទៅដោយជាតិប្រូតេអ៊ីនជួយឱ្យអ្នកកើនទម្ងន់ និងឡើងសាច់ដុំបានឆាប់៕