ជំងឺដាច់សរសៃឈាមខួរក្បាល (Stroke) គឺជាជំងឺដ៏គួរឲ្យខ្លាច និងជាបញ្ហាសុខភាពដែលគំរាមកំហែងដល់អាយុជីវិត។ វាជាជំងឺមួយប្រភេទដែលកើតឡើងដោយសារ លំហូរឈាមក្នុងខួរក្បាលថយចុះ ឬកាត់ផ្ដាច់ទាំងស្រុង។ នៅពេលលំហូរឈាមត្រូវកាត់ផ្ដាច់ កោសិកាខួរក្បាលនឹងចាប់ផ្ដើម ខូចខាត ឬស្លាប់ ភ្លាមៗតែម្ដង ព្រោះតែខ្វះអុកស៊ីសែន និងសារធាតុចិញ្ចឹម។
ជំងឺដាច់សរសៃឈាមខួរក្បាលទាមទារការសង្គ្រោះបន្ទាន់! ការសម្គាល់រោគសញ្ញាភ្លាមៗអាចជួយសង្គ្រោះជីវិតអ្នកជំងឺ និងកាត់បន្ថយផលវិបាករ៉ាំរ៉ៃ។
សញ្ញាគ្រោះថ្នាក់ទាំង ៥ (FIVE Danger Signs) ដែលកើតឡើងភ្លាមៗ៖
ប្រសិនបើអ្នក ឬនរណាម្នាក់ដែលនៅក្បែរអ្នកមានរោគសញ្ញាទាំងនេះ សូមចាត់ទុកវាជា អាសន្នវេជ្ជសាស្ត្រ ហើយត្រូវបញ្ជូនទៅមន្ទីរពេទ្យភ្លាម៖
- បាត់បង់លំនឹងភ្លាមៗ: អ្នកជំងឺ បាត់បង់លំនឹង ពេលឈរ ឬអង្គុយ ភ្លាមៗតែម្ដង។
- បញ្ហាភ្នែក: មើលទៅឃើញរូបបែកជាពីរ (Double Vision) ឬ មើលទៅមិនច្បាស់ ឬស្រវាំងភ្លាមៗ។
- មុខមានភាពខុសប្រក្រតី (វៀចមាត់): មុខមានភាពខុសប្រក្រតី ដោយ ធ្លាក់ ឬវៀចមាត់ម្ខាង មិនស្មើគ្នា នៅពេលព្យាយាមញញឹម។
- ដៃជើងទន់ខ្សោយ: ដៃជើងម្ខាងទន់ខ្សោយ ជាងម្ខាងទៀតខុសប្រក្រតី (ឧទាហរណ៍ មិនអាចលើកដៃទាំងពីរឡើងបាន)។
- និយាយខុស ឬមិនច្បាស់: អ្នកជំងឺ និយាយខុស (ច្រឡំភាសា) ឬ និយាយស្ដាប់មិនច្បាស់ (ងក់ៗ) ភ្លាមៗ។
សូមចាំថា “ពេលវេលាគឺជាខួរក្បាល”!
រាល់វិនាទីដែលកន្លងផុតទៅ ខួរក្បាលរបស់អ្នកជំងឺនឹងខូចខាតកាន់តែច្រើនឡើង។
សូមបញ្ជូនអ្នកជំងឺមកមន្ទីរពេទ្យឲ្យបានលឿនតាមដែលអាចធ្វើបាន ដើម្បីទទួលការពិនិត្យនិងព្យាបាលបន្ទាន់ (ដូចជាការចាក់ថ្នាំរំលាយកំណកឈាម) ឲ្យបានទាន់ពេលវេលា។ ការព្យាបាលលឿន រួមចំណែកជួយសង្គ្រោះជីវិត និងកាត់បន្ថយពិការភាពរយៈពេលវែង!
(ប្រភព៖ មន្ទីរពេទ្យមិត្តភាពខ្មែរ-សូវៀត)