ស្មានមិនដល់សោះថា ស្បែកមុខនឹងប្រែជាស្រស់ស្អាត ដោយគ្រាន់តែយក “ទឹកដំឡូងបារាំងស្រស់” មកធ្វើបែបនេះ

ភាគច្រើននៃពួកយើងសុទ្ធតែធ្លាប់បានដឹងរួចមកហើយអំពីអត្ថប្រយោជន៍នៃដំឡូងបារាំងចំពោះសុខភាពរាងកាយ! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែក្រៅពីអត្ថប្រយោជន៍សុខភាព តើអ្នកធ្លាប់បានចាប់អារម្មណ៍ទេថាទឹកដំឡូងបារាំងស្រស់ក៏អាចផ្ដល់ផលល្អៗអស្ចារ្យជាច្រើនចំពោះស្បែកមុខ? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរបៀបក្នុងការប្រើប្រាស់ទឹកដំឡូងបារាំងស្រស់ ដើម្បីទទួលបាននូវស្បែកមុខសថ្លាស្រស់ស្អាត ៖

– របៀបធ្វើទឹកដំឡូងបារាំងស្រស់

ដំបូងត្រូវលាងសម្អាតដំឡូងបារាំងឱ្យស្អាតជាមុនសិន រួចសឹមចិតសំបកចេញ ហើយកោស ឬឈូសយកសាច់ដំឡូងបារាំង។ បន្ទាប់មកយកសាច់ដំឡូងបារាំងដាក់ក្នុងក្រណាត់ស្បៃស្អាតមួយ ហើយចាប់ផ្ដើមច្របាច់យកទឹកដំឡូង។ ឬក៏អ្នកអាចហាន់ដំឡូងជាដុំៗ រួចដាក់ចូលក្នុងម៉ាស៊ីនកិន ឬកៀនយកទឹកផ្លែឈើ ហើយសឹមត្រងយកតែទឹកនៃដំឡូងបារាំងកុំឱ្យដោយកាកជាការស្រេច។ អ្នកអាចរក្សាទុកទឹកដំឡូងបារាំងក្នុងទូរទឹកកកដើម្បីប្រើប្រាស់បានដល់ទៅ ២ ថ្ងៃ ប្រសិនបើចាក់វាក្នុងក្រឡកែវមានគំរបបិទជិតមួយ។

– របៀបប្រើប្រាស់ដំឡូងបារាំងបង្កើនសម្រស់ស្បែកមុខ

១. កម្ចាត់ស្នាមមុន និងស្នាមអ៊ុចខ្មៅ

អ្វីដែលអ្នកត្រូវការ គឺទឹកដំឡូងបារាំង ១ ស្លាបព្រាបាយ និងទឹកប៉េងប៉ោះស្រស់ ១ ស្លាបព្រាបាយ។ ហើយអ្វីដែលអ្នកត្រូវធ្វើ គឺលាយទឹកដំឡូងបារាំងស្រស់ និងទឹកប៉េងប៉ោះស្រស់ចូលគ្នា។ កូរឱ្យសព្វ សឹមលាបទឹកល្បាយនេះលើស្នាមមុន និងស្នាមអ៊ុចខ្មៅលើផ្ទៃមុខរបស់អ្នក។ ទុកចោលសម្រាប់រយៈពេលប្រមាណពី ៤០ ទៅ ៤៥ នាទី សឹមលាងសម្អាតចេញជាមួយទឹកត្រជាក់ ឬទុកចោលពេញមួយយប់ សឹមលាងសម្អាតចេញនៅព្រឹកបន្ទាប់ក៏បាន។ អ្នកអាចអនុវត្តរូបមន្តនេះរាល់ថ្ងៃ រហូតទទួលបានលទ្ធផលគាប់ចិត្ត។

២. ទប់ស្កាត់ស្នាមជ្រីវជ្រួញ និងធ្វើឱ្យស្បែកមុខស

អ្វីដែលអ្នកត្រូវការ គឺដំឡូងបារាំង ១ មើមតូច,​ ការ៉ុត ១ មើមតូច និងម្ស៉ៅរមៀត ១ ចិប។ អ្វីដែលអ្នកត្រូវធ្វើ គឺស្ងោរដំឡូងបារាំង និងការ៉ុតក្នុងទឹកធម្មតាសម្រាប់រយៈពេលប៉ុន្មាននាទីរហូតដល់ទន់។ ទុកឱ្យចុះត្រជាក់ សឹមហាន់ជាដុំតូចៗ រួចចាប់ផ្ដើមកិនរហូតដល់ក្លាយជាល្បាយម៉ដ្ឋខាប់ៗ ហើយបន្ថែមម្ស៉ៅរមៀតចូល និងកូរឱ្យសព្វ។ លាបល្បាយនេះលើផ្ទៃមុខ និងទុកចោលសម្រាប់រយៈពេល ១៥ នាទីសិន សឹមលាងសម្អាតចេញជាមួយទឹកត្រជាក់។

៣. កម្ចាត់ស្នាមខ្មៅរង្វង់ខ្មៅក្រោមភ្នែក

អ្វីដែលអ្នកត្រូវការ គឺទឹកដំឡូងបារាំងស្រស់ចំនួន ២ ស្លាបព្រាកាហ្វេ និងទឹកត្រសក់ស្រស់ចំនួន ២ ស្លាបព្រាកាហ្វេ។ លាយទឹកដំឡូងបារាំង និងទឹកត្រសក់ចូលគ្នាឱ្យសព្វ សឹមលាបទឹកល្បាយក្រោមភ្នែកមុនពេលចូលគេងយប់។ លាងសម្អាតចេញនៅព្រឹកបន្ទាប់ជាមួយទឹកត្រជាក់៕