ទឹកខ្មេះប៉ោម (Apple Cider Vinegar – ACV) មិនមែនគ្រាន់តែជាគ្រឿងផ្សំនៅក្នុងផ្ទះបាយនោះទេ តែវាជាថ្នាំធម្មជាតិដែលត្រូវបានគេសិក្សាឃើញថាមានគុណប្រយោជន៍ដ៏អស្ចារ្យក្នុងការគ្រប់គ្រងជំងឺរ៉ាំរ៉ៃមួយចំនួន។ តើ ACV អាចធ្វើអ្វីបានខ្លះសម្រាប់សុខភាពរបស់អ្នក?
១. គ្រប់គ្រងកម្រិតជាតិស្ករក្នុងឈាមយ៉ាងមានប្រសិទ្ធភាព
សម្រាប់អ្នកមានជំងឺទឹកនោមផ្អែម ឬអ្នកដែលព្រួយបារម្ភពីជាតិស្ករខ្ពស់ ACV អាចជាជំនួយដ៏ល្អបំផុត។
- បន្ថយការរំលាយកាបូអ៊ីដ្រាត៖ ACV ជួយពន្យឺតសមត្ថភាពក្រពះក្នុងការរំលាយអាហារដែលមានផ្ទុកកាបូអ៊ីដ្រាត និងបំប្លែងវាទៅជាជាតិស្ករ។ នេះមានន័យថា ជាតិស្ករនឹងមិនឡើងលឿនក្រោយពេលញ៉ាំអាហារឡើយ។
- លទ្ធផលសិក្សាជាក់ស្តែង៖ ការសិក្សាបានបង្ហាញថា អ្នកជំងឺទឹកនោមផ្អែមប្រភេទទី ២ ដែលផឹក ACV មានការ ថយចុះកម្រិតជាតិស្ករក្នុងឈាមយ៉ាងខ្លាំង។ លើសពីនេះ ការផឹក ACV ជាមួយឈីសមុនពេលចូលគេង ត្រូវបានរកឃើញថាអាចជួយ បន្ថយជាតិស្ករពេលព្រឹក បានល្អប្រសើរជាងផឹកតែទឹក។
២. កាត់បន្ថយកម្រិតកូឡេស្តេរ៉ុល និងការពារបេះដូង
ACV ត្រូវបានភ្ជាប់ទៅនឹងសុខភាពបេះដូងតាមរយៈការគ្រប់គ្រងខ្លាញ់ក្នុងឈាម៖
- បង្កើនខ្លាញ់ល្អ (HDL)៖ ការស្រាវជ្រាវមួយចំនួនបានបង្ហាញថា ការប្រើប្រាស់ ACV អាចជួយ បង្កើនកម្រិតកូឡេស្តេរ៉ុលល្អ (HDL) ដែលមានសារៈសំខាន់ក្នុងការការពារសរសៃឈាមបេះដូង។
- កាត់បន្ថយខ្លាញ់អាក្រក់ (LDL)៖ ចំពោះអ្នកជំងឺទឹកនោមផ្អែមប្រភេទទី ២ ដែលទទួលទាន ACV រួមជាមួយរបបអាហារដែលមានសុខភាពល្អ គេសង្កេតឃើញមានការ ថយចុះកម្រិតកូឡេស្តេរ៉ុលអាក្រក់ (LDL) និងកូឡេស្តេរ៉ុលសរុប។
៣. ជួយគ្រប់គ្រងសម្ពាធឈាមខ្ពស់
សមាសធាតុ អាស៊ីតអាសេទិក ដែលមាននៅក្នុង ACV ត្រូវបានគេជឿថាអាចជួយគ្រប់គ្រងសម្ពាធឈាមបាន៖
- ប្រសិទ្ធភាពបន្ទាបឈាម៖ ការសិក្សាមួយបានបង្ហាញថា ការផឹក ACV ចំនួន ១ អោន (ប្រហែល ៣០ មិលី្លលីត្រ) អាចបន្ថយទាំងសម្ពាធឈាមស៊ីស្តូលិក និងឌីអាស្តូលិក។ ការសិក្សាផ្សេងទៀតក៏បានរកឃើញថា ការផឹកប្រហែល ០.៦ អោន (១៨ មិល្លីលីត្រ) ក៏អាចបន្ថយសម្ពាធឈាមស៊ីស្តូលិកបានបន្តិចដែរ។
សំគាល់៖ ដើម្បីទទួលបានគុណប្រយោជន៍ទាំងនេះ អ្នកគួរតែផឹក ACV ដោយលាយជាមួយទឹក ហើយត្រូវប្រាកដថាបានពិគ្រោះជាមួយគ្រូពេទ្យមុននឹងប្រើប្រាស់ជាការព្យាបាលបន្ថែម៕
(ប្រភពពី៖ បរទេស)