អាការៈ នោមទាស់ (Urinary Incontinence) គឺជាបញ្ហាទូទៅដែលមនុស្សជាច្រើនជួបប្រទះ ប៉ុន្តែជារឿយៗពួកគេមិនហ៊ាននិយាយ ឬស្វែងរកការព្យាបាលនោះទេ។ អាការៈនេះកើតឡើងនៅពេលដែលអ្នកមិនអាចគ្រប់គ្រងការបត់ជើងតូចបានពេញលេញ ដែលអាចនាំឱ្យមានការធ្លាយទឹកនោមដោយអចេតនា។ បញ្ហានេះមិនត្រឹមតែប៉ះពាល់ដល់ជីវិតប្រចាំថ្ងៃទេ ថែមទាំងអាចជាសញ្ញានៃបញ្ហាសុខភាពធ្ងន់ធ្ងរទៀតផង។
មូលហេតុចម្បងៗដែលនាំឱ្យកើតមានបញ្ហានោមទាស់
បញ្ហានោមទាស់អាចបណ្តាលមកពីកត្តាជាច្រើន ដែលភាគច្រើនទាក់ទងនឹងភាពចុះខ្សោយនៃសាច់ដុំប្លោកនោម ឬបញ្ហានៃប្រព័ន្ធប្រសាទ៖
១. ការចុះខ្សោយនៃសាច់ដុំអាងត្រគាក
- ការសម្រាលកូន: ចំពោះស្ត្រី, ការសម្រាលកូនអាចធ្វើឱ្យសាច់ដុំនៅតំបន់អាងត្រគាក (ដែលជួយទប់ប្លោកនោម) លាតសន្ធឹង ឬចុះខ្សោយ។
- ការវះកាត់: ការវះកាត់នៅតំបន់អាងត្រគាក ឬក្រពេញប្រូស្តាត (ចំពោះបុរស) អាចប៉ះពាល់ដល់សាច់ដុំទាំងនេះ។
- អាយុ: ភាពចាស់ធ្វើឱ្យសាច់ដុំទន់ខ្សោយ និងអាចកាត់បន្ថយសមត្ថភាពប្លោកនោមក្នុងការផ្ទុកទឹកនោមបានយូរ។
២. បញ្ហាក្រពេញប្រូស្តាត (ចំពោះបុរស)
- ក្រពេញប្រូស្តាតរីកធំ: ការរីកធំនៃក្រពេញប្រូស្តាតអាចដាក់សម្ពាធទៅលើបង្ហួរនោម ដែលធ្វើឱ្យការបញ្ចេញចោលមិនបានពេញលេញ ហើយនាំឱ្យមានការធ្លាយទឹកនោម។
៣. ការខូចខាតប្រព័ន្ធប្រសាទ
- ជំងឺដូចជា ទឹកនោមផ្អែម រ៉ាំរ៉ៃ, ជំងឺផាកឃីនសាន់ (Parkinson’s), ជំងឺដាច់សរសៃឈាមខួរក្បាល, ឬរបួសឆ្អឹងខ្នង អាចរំខានដល់សញ្ញាប្រព័ន្ធប្រសាទដែលបញ្ជាដល់ប្លោកនោម។
៤. ការឆ្លងមេរោគផ្លូវទឹកនោម (UTI)
- ពេលមានការឆ្លងមេរោគ ប្លោកនោមអាចក្លាយជា រលាក និងមានការកន្ត្រាក់ខ្លាំង ដែលបណ្តាលឱ្យមានតម្រូវការបត់ជើងតូចញឹកញាប់ និងអាចនោមទាស់ដោយមិនបានរំពឹងទុក។
៥. ជំងឺទល់លាមករ៉ាំរ៉ៃ
- លាមកដែលកកកុញច្រើនពេកនៅក្នុងពោះវៀនធំអាចដាក់សម្ពាធលើប្លោកនោម ដែលជាហេតុនាំឱ្យប្លោកនោមចុះខ្សោយ។
ផលវិបាកអវិជ្ជមាននៃការនោមទាស់
ផលវិបាកនៃការនោមទាស់មិនត្រឹមតែជាបញ្ហានៅលើគ្រែប៉ុណ្ណោះទេ ថែមទាំងប៉ះពាល់ដល់គុណភាពជីវិតប្រចាំថ្ងៃទៀតផង៖
- បញ្ហានៃស្បែក: សំណើមរ៉ាំរ៉ៃអាចបណ្តាលឱ្យរលាកស្បែក, កន្ទួលរមាស់, និងការឆ្លងមេរោគផ្សិតនៅតំបន់ប្រដាប់ភេទ។
- ការឆ្លងមេរោគញឹកញាប់: បញ្ហាទាក់ទងនឹងការបញ្ចេញចោលមិនអស់អាចបង្កើនហានិភ័យនៃការឆ្លងមេរោគផ្លូវទឹកនោមម្តងហើយម្តងទៀត។
- ផលប៉ះពាល់ផ្លូវចិត្ត: មនុស្សដែលមានបញ្ហានោមទាស់ច្រើនមានអារម្មណ៍ អៀនខ្មាស, ថប់បារម្ភ, និងធ្លាក់ទឹកចិត្ត ដែលនាំឱ្យពួកគេចៀសវាងការចូលរួមសកម្មភាពសង្គម។
- កម្រិតគុណភាពជីវិតទាប: ភាពតានតឹងក្នុងការគ្រប់គ្រងទឹកនោមប៉ះពាល់ដល់ការងារ, ការគេង, និងទំនាក់ទំនងប្រចាំថ្ងៃ។
ប្រសិនបើអ្នក ឬសមាជិកគ្រួសារមានបញ្ហានោមទាស់ សូមកុំនៅស្ងៀម។ ការពិគ្រោះជាមួយគ្រូពេទ្យអាចជួយកំណត់មូលហេតុពិតប្រាកដ និងស្វែងរកការព្យាបាលសមស្រប ដូចជាការព្យាបាលដោយលំហាត់ប្រាណពង្រឹងសាច់ដុំអាងត្រគាក (Kegel exercises) ឬការប្រើប្រាស់ថ្នាំ៕
(ប្រភពពី៖ បរទេស)