តើអ្នកឧស្សាហ៍យកប្រេងចៀនដែលប្រើហើយមកចៀនម្ហូបម្តងទៀតទេ? ទម្លាប់សន្សំសំចៃនេះកំពុងបង្កើនហានិភ័យធ្ងន់ធ្ងរដល់សុខភាពរបស់អ្នក។ នៅពេលដែលប្រេងត្រូវបានកម្តៅម្តងហើយម្តងទៀត វាមិនត្រឹមតែបាត់បង់គុណភាពប៉ុណ្ណោះទេ ថែមទាំងក្លាយទៅជាប្រភពនៃ សារធាតុពុល ទៀតផង។
១. ប្រេងឆាបញ្ចេញផ្សែងពុលនៅសីតុណ្ហភាពខ្ពស់
នៅពេលប្រេងឆាត្រូវបានប្រើប្រាស់ដល់សីតុណ្ហភាពខ្ពស់ពេក វាចាប់ផ្តើមបញ្ចេញ ផ្សែងពុល។ នៅពេលប្រេងឈានដល់ ចំណុចផ្សែង វានឹងមានក្លិនមិនល្អ ហើយសារធាតុគីមីមិនល្អត្រូវបានបញ្ចេញទាំងទៅក្នុងខ្យល់ដែលអ្នកដកដង្ហើម និងចូលទៅក្នុងអាហារដែលអ្នកកំពុងចម្អិន។
២. បង្កើនហានិភ័យនៃជំងឺធ្ងន់ធ្ងរ
ការប្រើប្រាស់ប្រេងឆាចាស់ម្តងហើយម្តងទៀតធ្វើឱ្យសមាសធាតុគីមីរបស់វាប្រែប្រួល និងបង្កើតជា អាស៊ីតខ្លាញ់សេរី។ ការទទួលទានអាហារដែលចម្អិនដោយប្រេងប្រភេទនេះអាចបង្កើនហានិភ័យនៃជំងឺជាច្រើនដូចជា៖
- ជំងឺបេះដូង
- ជំងឺមហារីក
- ជំងឺភ្លេចភ្លាំង (Alzheimer’s)
- បញ្ហារលាកក្រពះ និងអាស៊ីត
- រលាកបំពង់ក
៣. បណ្តាលឲ្យលើសសម្ពាធឈាម
សមាសធាតុគីមីដែលផ្លាស់ប្តូរនៅក្នុងប្រេងចាស់អាចបណ្តាលឱ្យមានការពុលជាលិកា បង្កជាស្រទាប់ខ្លាញ់ និងបង្កើន ភាពតានតឹងអុកស៊ីតកម្ម នៅក្នុងរាងកាយ។ ជាលទ្ធផល នេះអាចជាកត្តាដែលជំរុញឱ្យអ្នក លើសសម្ពាធឈាម និងបញ្ហាសុខភាពដទៃទៀត។
ដើម្បីសុខភាពល្អ អ្នកគួរតែ ចៀសវាងការប្រើប្រេងចាស់ម្តងហើយម្តងទៀត។ ប្រើប្រាស់ប្រេងឆាដែលមានគុណភាព និងផ្លាស់ប្តូរវាបន្ទាប់ពីការប្រើប្រាស់ម្តងៗ ដើម្បីការពារខ្លួនអ្នក និងគ្រួសាររបស់អ្នកពីសារធាតុពុល៕
ប្រភពពី៖ បរទេស