ប្រយ័ត្ន! ទម្លាប់ទាំង ៩ នេះអាចធ្វើឲ្យអ្នកកើតក្រួសក្នុងតម្រងនោមដោយមិនដឹងខ្លួន

ក្រួសក្នុងតម្រងនោម គឺជាជំងឺដ៏ឈឺចាប់ដែលកើតឡើងនៅពេលសារធាតុរ៉ែ និងអំបិលកកកុញបង្កើតបានជាដុំក្រួសរឹងនៅក្នុងតម្រងនោម។ ការកកើតក្រួសទាំងនេះភាគច្រើនបណ្តាលមកពីទម្លាប់រស់នៅប្រចាំថ្ងៃរបស់យើង។ ដើម្បីការពារខ្លួនអ្នកពីជំងឺនេះ សូមចៀសវាងឥរិយាបថ ៩ យ៉ាងខាងក្រោមនេះ។

​

១. ផឹកទឹកមិនគ្រប់គ្រាន់

នេះជាមូលហេតុចម្បងបំផុតដែលនាំឲ្យកើតក្រួសក្នុងតម្រងនោម។ នៅពេលដែលអ្នកផឹកទឹកមិនគ្រប់គ្រាន់ ទឹកនោមរបស់អ្នកនឹងមានកំហាប់កាន់តែខ្ពស់ ដែលធ្វើឲ្យសារធាតុរ៉ែដូចជា កាល់ស្យូម អុកសាលេត និងអាស៊ីតយូរិក ប្រមូលផ្តុំគ្នាក្លាយជាក្រួស។

២. ញ៉ាំអាហារប្រៃពេក

ការទទួលទានអាហារដែលមានជាតិប្រៃខ្ពស់ដូចជា អាហារកែច្នៃ អាហាររហ័ស អាហារកំប៉ុង ឬអាហារជ្រក់ អាចបង្កើនកម្រិតសូដ្យូមនៅក្នុងទឹកនោម។ ពេលកម្រិតសូដ្យូមខ្ពស់ វាក៏អាចបង្កើនការបញ្ចេញជាតិកាល់ស្យូមតាមទឹកនោម ដែលជាហេតុធ្វើឲ្យមានការកកើតក្រួស។

៣. ញ៉ាំប្រូតេអ៊ីនសត្វច្រើនពេក

ការទទួលទានសាច់ក្រហម សាច់មាន់ ឬអាហារសមុទ្រច្រើនពេកអាចបង្កើនកម្រិតអាស៊ីតយូរិក (Uric Acid) និងកាល់ស្យូមនៅក្នុងទឹកនោម។ កម្រិតអាស៊ីតយូរិកខ្ពស់អាចបង្កើតជាក្រួសអាស៊ីតយូរិកបាន។

៤. ញ៉ាំអាហារសម្បូរអុកសាលេត (Oxalate)

ក្រួសក្នុងតម្រងនោមភាគច្រើនជាប្រភេទកាល់ស្យូមអុកសាលេត។ អាហារមួយចំនួនមានផ្ទុកសារធាតុអុកសាលេតខ្ពស់ដូចជា៖ ស្ពៃខ្មៅ សូកូឡា អាល់ម៉ុន និងគ្រាប់ស្វាយចន្ទី។ ការទទួលទានអាហារទាំងនេះក្នុងបរិមាណច្រើនអាចបង្កើនកម្រិតអុកសាលេតនៅក្នុងទឹកនោម។

៥. ញ៉ាំភេសជ្ជៈផ្អែម និងភេសជ្ជៈប៉ូវកម្លាំង

ភេសជ្ជៈទាំងនេះភាគច្រើនមានផ្ទុកជាតិស្ករ fructose ច្រើន ដែលអាចបង្កើនហានិភ័យនៃក្រួសក្នុងតម្រងនោម។

៦. របបអាហារដែលមានកង្វះជាតិកាល់ស្យូម

ទោះបីជាក្រួសភាគច្រើនមានផ្ទុកកាល់ស្យូមក៏ដោយ ក៏ការខ្វះជាតិកាល់ស្យូមពីអាហារអាចបង្កើនហានិភ័យនៃក្រួស។ ជាតិកាល់ស្យូមអាចភ្ជាប់ជាមួយអុកសាលេតនៅក្នុងពោះវៀនមុនពេលវាចូលទៅក្នុងតម្រងនោម។ ដូច្នេះហើយការទទួលទានកាល់ស្យូមពីអាហារគ្រប់គ្រាន់ ដូចជាទឹកដោះគោ និងបន្លែ អាចជួយកាត់បន្ថយក្រួស។

៧. របៀបរស់នៅអសកម្ម

កង្វះការហាត់ប្រាណអាចនាំឲ្យមានការបញ្ចេញជាតិកាល់ស្យូមចេញពីឆ្អឹងច្រើនពេកទៅក្នុងចរន្តឈាម ដែលអាចបង្កជាក្រួស។ ការហាត់ប្រាណទៀងទាត់ជួយរក្សាកម្រិតកាល់ស្យូមក្នុងខ្លួនមានតុល្យភាព។

៨. ជំងឺរលាកពោះវៀន (Inflammatory Bowel Disease)

អ្នកដែលមានជំងឺរលាកពោះវៀន អាចប្រឈមនឹងក្រួសក្នុងតម្រងនោមខ្ពស់ជាងធម្មតា ព្រោះបញ្ហានេះអាចប៉ះពាល់ដល់ការស្រូបយកខ្លាញ់ និងអុកសាលេត។

៩. ការប្រើប្រាស់ថ្នាំមួយចំនួន

ថ្នាំមួយចំនួនដូចជា ថ្នាំបញ្ចុះទឹកនោម (Diuretics) អាចបង្កើនកម្រិតកាល់ស្យូមក្នុងទឹកនោម។ ប្រសិនបើអ្នកកំពុងប្រើថ្នាំទាំងនេះ អ្នកគួរតែពិគ្រោះជាមួយគ្រូពេទ្យដើម្បីទទួលបានការណែនាំត្រឹមត្រូវ។

​

ដើម្បីការពារសុខភាពតម្រងនោម និងជៀសវាងក្រួស អ្នកគួរតែផ្លាស់ប្តូរទម្លាប់រស់នៅប្រចាំថ្ងៃរបស់អ្នក។ ចាប់ផ្តើមពីការផឹកទឹកឲ្យបានគ្រប់គ្រាន់ កាត់បន្ថយជាតិសូដ្យូម និងជាតិស្ករ ក៏ដូចជាបរិភោគអាហារដែលមានតុល្យភាព និងធ្វើលំហាត់ប្រាណជាប្រចាំ។ តើអ្នកបានអនុវត្តឥរិយាបថទាំងនេះហើយឬនៅ?