គន្លឹះថែរក្សាសុខភាព៖ ទឹកស្លឹកតើយ និងចាហួយប្រទាលកន្ទុយក្រពើ ភេសជ្ជៈដ៏ល្អបំផុតសម្រាប់រាងកាយ​ស្រស់ស្រាយដល់បេះដូង!

​
ធ្លាប់ស្រម៉ៃចង់ញ៉ាំភេសជ្ជៈដែលទាំងត្រជាក់ ទាំងឆ្ងាញ់ ហើយថែមទាំងជួយសុខភាពទេ? ថ្ងៃនេះ យើងនឹងចែករំលែករូបមន្តធ្វើ ទឹកស្លឹកតើយជាមួយចាហួយប្រទាលកន្ទុយក្រពើ ដែលមិនត្រឹមតែងាយស្រួលធ្វើទេ ថែមទាំងផ្តល់អត្ថប្រយោជន៍ពេញទំហឹងដល់រាងកាយទៀតផង។

អាថ៌កំបាំងធ្វើចាហួយប្រទាលកន្ទុយក្រពើឱ្យស្អាតគ្មានជ័រល្វីង

ការរៀបចំចាហួយប្រទាលកន្ទុយក្រពើឱ្យបានត្រឹមត្រូវគឺជាគន្លឹះសំខាន់ដើម្បីទទួលបានភេសជ្ជៈដ៏ល្អឥតខ្ចោះ។

1. ជ្រើសរើស និងកាត់៖ ជ្រើសរើសស្លឹកដែលខ្ចីហើយគ្មានស្នាមជាំ។ កាត់គល់ស្លឹក រួចផ្អាប់វាទុកចោល ១៥-២០ នាទី ដើម្បីឱ្យជ័រពណ៌លឿង (Alloin) ហូរចេញអស់។
2. បកសំបក និងលាងជម្រះ៖ ប្រើកាំបិតមុតស្រួចបកសំបកខាងក្រៅពណ៌បៃតងចេញ រួចយកផ្នែកថ្លាខាងក្នុងទៅកាត់ជាដុំតូចៗ។ បន្ទាប់មក យកដុំចាហួយទាំងនោះទៅលាងទឹក ២-៣ ដង។
3. កម្ចាត់ជ័រដោយគ្រឿងផ្សំធម្មជាតិ៖ ដើម្បីកម្ចាត់ស្លេស្ម និងក្លិនជ័រល្វីងបានល្អ អ្នកគួរតែ បន្ថែមអំបិលបន្តិច ពេលកំពុងលាង ហើយច្របាច់ ក្រូចឆ្មាបន្តិច ចូលរួចត្រាំវាទុកចោល ៥ នាទី។ បន្ទាប់មកលាងសម្អាតជាមួយទឹកស្អាតម្តងទៀត។

នៅពេលអ្នកធ្វើតាមវិធីនេះ ចាហួយប្រទាលកន្ទុយក្រពើរបស់អ្នកនឹងមានសភាពថ្លា គ្មានរសជាតិល្វីង និងគ្មានក្លិនឆ្អាបទៀតឡើយ។

រូបមន្តទឹកស្លឹកតើយដ៏ងាយស្រួល

គ្រឿងផ្សំ:

• ស្លឹកតើយស្រស់ ១០ សន្លឹក
• ទឹកស្អាត ១ លីត្រ
• ស្ករ ឬទឹកឃ្មុំ ៣ ស្លាបព្រាបាយ
• ចាហួយប្រទាលកន្ទុយក្រពើ ១ ពែង

របៀបធ្វើ:

1. ដាក់ស្លឹកតើយចូលទៅក្នុងឆ្នាំងទឹកស្អាត រួចដាំឱ្យពុះលើភ្លើងតិចៗរយៈពេល ១០-១៥ នាទី។
2. បន្ថែមស្ករ ឬទឹកឃ្មុំចូល រួចកូរឱ្យរលាយ។ បន្ទាប់មកទុកឱ្យវាត្រជាក់។
3. ចាក់ទឹកស្លឹកតើយចូលទៅក្នុងកែវ រួចដាក់ចាហួយប្រទាលកន្ទុយក្រពើដែលបានរៀបចំរួចចូល។
4. ដាក់ទឹកកកហើយទទួលទានជាការស្រេច។

អត្ថប្រយោជន៍សុខភាពដ៏អស្ចារ្យ

• ជំនួយដល់ស្បែក: ប្រទាលកន្ទុយក្រពើមានសារធាតុប្រឆាំងអុកស៊ីតកម្ម និងវីតាមីន ដែលជួយផ្តល់សំណើមដល់ស្បែក កាត់បន្ថយការរលាក និងអាចបំបាត់ស្នាមអុចខ្មៅបានទៀតផង។
• កាត់បន្ថយកម្ដៅក្នុងខ្លួន: ទឹកស្លឹកតើយមានឥទ្ធិពលធ្វើឱ្យរាងកាយត្រជាក់។ ពេលទទួលទានជាមួយចាហួយប្រទាលកន្ទុយក្រពើ វាជួយបំបាត់អាការៈក្តៅក្នុងខ្លួន និងធ្វើឱ្យមានអារម្មណ៍ស្រស់ស្រាយ។
• ជំរុញប្រព័ន្ធរំលាយអាហារ: ជាតិសរសៃក្នុងចាហួយប្រទាលកន្ទុយក្រពើជួយសម្រួលដល់ចលនាពោះវៀន ធ្វើឱ្យប្រព័ន្ធរំលាយអាហារដំណើរការល្អ និងកាត់បន្ថយការទល់លាមក។

ដូច្នេះ ទឹកស្លឹកតើយជាមួយចាហួយប្រទាលកន្ទុយក្រពើ មិនមែនត្រឹមតែជាភេសជ្ជៈសម្រាប់បំបាត់ការស្រេកឃ្លាននោះទេ តែវាក៏ជាឱសថធម្មជាតិដ៏ល្អសម្រាប់ថែរក្សាសុខភាពពីខាងក្នុងផងដែរ។

ចំណុចសម្គាល់
សូមលោកអ្នកពិសាដោយការប្រុងប្រយ័ត្ន! និងទទួលខុសត្រូវដោយខ្លួនឯង៕