មនុស្សភាគច្រើនតែងតែគិតថា ការបន្ទោរបង់មកមានឈាមក្រហមគឺបណ្តាលមកពីជំងឺឫសដូងបាតតែមួយមុខគត់។ ប៉ុន្តែការពិតគឺផ្ទុយស្រឡះ! ការគិតខុសនេះអាចធ្វើឱ្យយើងធ្វេសប្រហែស និងខកខានឱកាសព្យាបាលជំងឺធ្ងន់ធ្ងរបានទាន់ពេលវេលា។
មូលហេតុផ្សេងៗក្រៅពីជំងឺឫសដូងបាត
ការបន្ទោរបង់មានឈាមក្រហមអាចបណ្តាលមកពីបញ្ហាមួយចំនួននៅតំបន់រន្ធគូថ ដូចជាការដាច់រហែកស្បែករន្ធគូថ (Anal fissure)។ ប៉ុន្តែអ្វីដែលគួរឱ្យព្រួយបារម្ភជាងនេះ គឺវាអាចជារោគសញ្ញានៃជំងឺគ្រោះថ្នាក់ដែលកើតឡើងនៅក្នុងពោះវៀនធំដូចជា៖
- ដុំសាច់មហារីកពោះវៀនធំ (Colon cancer)
- ដុំសាច់ Polyp (Colonic polyp)
- ដំបៅពោះវៀនធំ (Colonic ulcer)
- ការហូរឈាមដោយសារជំងឺពោះវៀនធំ (Colonic Diverticula)
សម្រាប់ហេតុផលនេះហើយ ទើបក្រុមវេជ្ជបណ្ឌិតឯកទេសផ្នែកក្រពះពោះវៀនតែងតែមានការប្រុងប្រយ័ត្នខ្ពស់។ ត្រឹមតែការពិនិត្យឫសដូងបាតមិនអាចបញ្ជាក់ថាឈាមនោះមកពីណាបានច្បាស់លាស់នោះទេ។
ពេលណាដែលត្រូវទៅពិនិត្យឆ្លុះពោះវៀន?
វេជ្ជបណ្ឌិតនឹងណែនាំឱ្យធ្វើការពិនិត្យឆ្លុះពោះវៀនធំ (Total colonoscopy) ដើម្បីរកមូលហេតុពិតប្រាកដ ប្រសិនបើអ្នកមានរោគសញ្ញារួមផ្សំដូចខាងក្រោម៖
- អាយុលើសពី ៤៥ ឆ្នាំឡើងទៅ
- មានការបាត់បង់ឈាមក្រហមខ្លាំង
- មានអាការៈឈឺពោះរ៉ាំរ៉ៃ
- ស្រកទម្ងន់លឿនខុសធម្មតា
- គ្រូពេទ្យពិនិត្យឃើញដុំសាច់ក្នុងពោះ
- មានប្រវត្តិគ្រួសារកើតជំងឺមហារីក
ដើម្បីសុវត្ថិភាព និងសុខភាពរបស់អ្នក សូមកុំមើលរំលងការបន្ទោរបង់មានឈាម។ សូមកុំភ័យខ្លាចក្នុងការទៅពិគ្រោះ និងទទួលការពិនិត្យពីវេជ្ជបណ្ឌិតឯកទេស។ ការធ្វើរោគវិនិច្ឆ័យបានទាន់ពេលវេលា អាចជួយសង្គ្រោះជីវិតអ្នកបាន៕
ប្រភព៖ មន្ទីរពេទ្យកាល់ម៉ែត