តើអ្នកធ្លាប់ជួបបញ្ហាគេងមិនលក់ ឬគេងមិនស្កប់ទេ? ការគេងមិនគ្រប់គ្រាន់អាចបណ្ដាលឱ្យប៉ះពាល់ដល់សុខភាពទាំងផ្លូវកាយនិងផ្លូវចិត្ត។ ប៉ុន្តែកុំបារម្ភ! ការអនុវត្តតិចនិកងាយៗទាំង ៥ នេះអាចជួយឱ្យអ្នកគេងលក់ស្រួលដល់ភ្លឺ។
១. រក្សាពេលវេលាចូលគេងឱ្យទៀងទាត់
ការចូលគេងនិងភ្ញាក់ពីគេងនៅម៉ោងដដែលជារៀងរាល់ថ្ងៃ សូម្បីតែនៅថ្ងៃឈប់សម្រាក ក៏ជួយសម្រួលដល់ចង្វាក់នៃការគេងរបស់រាងកាយផងដែរ។ ការធ្វើបែបនេះអាចជួយឱ្យអ្នកគេងលក់លឿនជាងមុន។
២. ចៀសវាងគ្រឿងស្រវឹងនិងកាហ្វេអ៊ីន
ការផឹកកាហ្វេនៅពេលល្ងាច ឬជិតដល់ម៉ោងចូលគេងអាចធ្វើឱ្យអ្នកគេងមិនលក់ ព្រោះជាតិកាហ្វេអ៊ីនអាចស្ថិតនៅក្នុងខ្លួនបានរហូតដល់ទៅ ៦ ម៉ោង។ លើសពីនេះ ជាតិស្រវឹងក៏អាចរំខានដល់ដំណេកដ៏ស្កប់ស្កល់របស់អ្នកផងដែរ។
៣. បង្កើតបរិយាកាសក្នុងបន្ទប់គេងឱ្យស្ងប់ស្ងាត់
បន្ទប់គេងគួរតែងងឹត ត្រជាក់ និងស្ងាត់។ បិទភ្លើង ឬប្រើវាំងននក្រាស់ៗដើម្បីរារាំងពន្លឺពីខាងក្រៅ។ ត្រូវប្រាកដថាសីតុណ្ហភាពនៅក្នុងបន្ទប់មានភាពត្រជាក់ល្មម ព្រោះវានឹងជួយឱ្យអ្នកគេងលក់បានលឿន។
៤. ហាត់ប្រាណជាប្រចាំ
ការហាត់ប្រាណអាចជួយឱ្យអ្នកគេងលក់ស្រួលជាងមុន ព្រោះវាជួយកាត់បន្ថយភាពស្ត្រេស និងបង្កើនភាពនឿយហត់របស់រាងកាយ។ ប៉ុន្តែគួរចៀសវាងការហាត់ប្រាណធ្ងន់ៗមុនម៉ោងចូលគេង។ គួរហាត់ប្រាណនៅពេលព្រឹក ឬពេលរសៀលទើបល្អបំផុត។
៥. បន្ថយការប្រើប្រាស់ឧបករណ៍អេឡិចត្រូនិក
ពន្លឺពណ៌ខៀវ (Blue Light) ដែលបញ្ចេញចេញពីអេក្រង់ទូរស័ព្ទ កុំព្យូទ័រ ឬទូរទស្សន៍ អាចរំខានដល់ការផលិតអ័រម៉ូន Melatonin ដែលជាអ័រម៉ូនជួយឱ្យគេងលក់។ គួរចៀសវាងការប្រើប្រាស់ឧបករណ៍ទាំងនេះយ៉ាងហោចណាស់ ១ ម៉ោងមុនចូលគេង។
ការអនុវត្តតិចនិកទាំងនេះមិនត្រឹមតែជួយឱ្យអ្នកគេងលក់ស្រួលនោះទេ ថែមទាំងជួយឱ្យសុខភាពរបស់អ្នកកាន់តែប្រសើរឡើងផងដែរ។
ចំណុចសម្គាល់
ប្រសិនបើលោកអ្នកមានបញ្ហាសុខភាពមិនប្រក្រតី ប្រញាប់ទៅជួបគ្រូពេទ្យដើម្បីទទួលបានការព្យាបាលត្រឹមត្រូវ៕