បេក្ខជនបាក់ឌុប​ងើបពីសង្គ្រោះ​ តស៊ូមកប្រឡង ​តែត្រូវបញ្ជូនចូលពេទ្យវិញ នៅខេត្តសៀមរាប

ខេត្តពោធិ៍សាត់៖ បេក្ខជនប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ១រូប ត្រូវបានបញ្ជូនតាមរថយន្តសង្គ្រោះមកមណ្ឌលប្រឡងក្នុងស្ថានភាពធ្ងន់ធ្ងរបាត់បង់ស្មារតី ដោយក្រុមគ្រូពេទ្យពិនិត្យឃើញថាមិនអាចប្រឡងបានទេ ទើបដឹកត្រលប់ទៅបន្តសម្រាកព្យាបាលឡើងវិញ។

យោងតាមការចុះផ្សាយរបស់អង្គភាពប្រឆាំងអំពើពុករលួយ(ACU) បានឱ្យដឹងថានៅខេត្តសៀមរាប ក្នុងមណ្ឌវិទ្យាល័យ១០មករា១៩៧៩ជើងនាព្រឹកថ្ងៃទី២៩ ខែសីហានេះ មានករណីបេក្ខជនឈ្មោះ ដូង ពនេអព្យា ភេទប្រុស បន្ទប់លេខ ២៩ លេខតុ ៧១៤ បានបញ្ជូនតាមរថយន្តសង្គ្រោះមកមណ្ឌលប្រឡងក្នុងស្ថានភាពធ្ងន់ធ្ងរបាត់បង់ស្មារតី។

តាមការផ្ដល់ព័ត៌មានពីអាណាព្យាបាលបានឱ្យដឹងថា កាលពីយប់មិញ បេក្ខជន ដូង ពនេអព្យា បានដួលប៉ះទង្គិចក្បាលនៅកន្លែងស្នាក់នៅ ហើយបានចូលសម្រាកនៅមន្ទីរពេទ្យឯកជនមួយនៅក្នុងខេត្តសៀមរាប។ លុះព្រឹកឡើង អាណាព្យាបាលក៏បានទាក់ទងមកមណ្ឌលសុំការអនុញ្ញាតដើម្បីឱ្យបេក្ខជនចូលប្រឡង តែក្រោយពីបញ្ជូនមកមណ្ឌលប្រឡងគ្រូពេទ្យប្រចាំមណ្ឌលបានពិនិត្យឃើញថា បេក្ខជន មិនអាចប្រឡងបានទេ ហើយត្រូវបានបញ្ជូនទៅមន្ទីរពេទ្យបង្អែកខេត្តសៀមរាប ដើម្បីបន្តការព្យាបាល។
​
​ជាមួយគ្នានេះ ក្រសួងអប់រំ យុវជន និងកីឡា បានជំរុញលើកចិត្តឱ្យបេក្ខជនប្រឡងទាំងអស់ត្រូវថែរក្សាសុខភាពឱ្យបានល្អ សម្រាក និងបរិភោគអាហារឱ្យបានគ្រប់គ្រាន់ប្រកបដោយអនាម័យ ដើម្បីទទួលបានលទ្ធផលល្អប្រសើរក្នុងការប្រឡង៕