ខេត្តពោធិ៍សាត់៖ បេក្ខនារីប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ១រូប មានសំពាធឈាមចុះខ្សោយខ្លាំង ដោយមានអាការៈខ្យល់គរ ទទួលការសង្គ្រោះពីសំណាក់ក្រុមគ្រូពេទ្យប្រចាំការនៅខេត្តពោធិ៍សាត់។
យោងតាមការចុះផ្សាយរបស់អង្គភាពប្រឆាំងអំពើពុករលួយ(ACU) បានឱ្យដឹងថានៅខេត្តពោធិ៍សាត់ ក្នុងមណ្ឌលបឋមសិក្សាពោធិ៍សាត់
នាព្រឹកថ្ងៃទី២៩ ខែសីហានេះ មានករណីបេក្ខនារីឈ្មោះ ថន កណិកា បន្ទប់២៥ តុ៦១៧ មានបញ្ហាសុខភាពអការៈមិនស្រួលខ្លួន(ខ្យល់គរ) អំឡុងពេលប្រឡងលើមុខវិជ្ជា គណិតវិទ្យា។ ក្រុមគ្រូពេទ្យប្រចាំការមណ្ឌល បានបញ្ជូនចូលបន្ទប់ពិនិត្យសុខភាពឃើញថា បេក្ខជនមានសំពាធឈាមចុះខ្សោយខ្លាំង។
បេក្ខជនបានបញ្ចប់សំណេរប្រឡងខាងលើមុនម៉ោង ទើបមានបញ្ហាសុខភាព។
បច្ចុប្បន្ន បេក្ខជន កំពុងទទួលបានការយកចិត្តទុកដាក់ពី ក្រុមគ្រូពេទ្យ និងគណៈកម្មការមណ្ឌលប្រឡង។
ជាមួយគ្នានេះ ក្រសួងអប់រំ យុវជន និងកីឡា បានជំរុញលើកចិត្តឱ្យបេក្ខជនប្រឡងទាំងអស់ត្រូវថែរក្សាសុខភាពឱ្យបានល្អ សម្រាក និងបរិភោគអាហារឱ្យបានគ្រប់គ្រាន់ប្រកបដោយអនាម័យ ដើម្បីទទួលបានលទ្ធផលល្អប្រសើរក្នុងការប្រឡង៕